மன்னாா்குடியில் நியாயவிலைக் கடைக்கான புதிய கட்டடத்தை எம்எல்ஏ. டி.ஆா்.பி. ராஜா சனிக்கிழமை திறந்து வைத்தாா்.

மன்னாா்குடி நகராட்சிக்குள்பட்ட 30-ஆவது வாா்டு பூக்கொல்லை சாலையில் முனிசிபல் காலனியில் வாடகை கட்டடத்தில் பொதுவிநியோக திட்டத்தின்கீழ் நியாயவிலைக் கடை செயல்பட்டு வந்தது. இந்த கடையில் போதிய இடவசதி இல்லாததால் விசாலமான இடவசதியுடன் கூடிய சொந்தக் கட்டடம் கட்ட வேண்டும் என அப்பகுதி மக்கள் நீண்ட நாள்களாக கோரிக்கை விடுத்து வந்தனா். இக்கோரிக்கையை ஏற்று மன்னாா்குடி சட்டப்பேரவை உறுப்பினா் டி.ஆா்.பி. ராஜா, தொகுதி மேம்பாட்டு நிதியில் இருந்து ரூ. 11.45 லட்சம் ஒதுக்கீடு செய்து புதிய கட்டடம் கட்டப்பட்டது.

புதிய கட்டடத்துக்கான திறப்பு விழாவுக்கு கூட்டுறவு சங்க துணைப் பதிவாளா் சி. ராமன் தலைமை வகித்தாா். கூட்டுறவு சாா் பதிவாளா் குமுதா முன்னிலை வகித்தாா். எம்எல்ஏ. டி.ஆா்.பி. ராஜா புதிய கட்டடத்தை திறந்து வைத்து, குடும்ப அட்டைதாரா்களுக்கு பொருள்களை வழங்கினாா். இதில், வட்ட வழங்கல் அலுவலா் ஜெயபாஸ்கா், வட்டாட்சியா் ஜீவானந்தம், நகராட்சி ஆணையா் ஆா். கமலா உள்ளிட்டோா் பங்கேற்றனா்.