குலசேகரம் பகுதியில் ஓராண்டாக தொடா் திருட்டில் ஈடுபட்டவா் வியாழக்கிழமை கைதுசெய்யப்பட்டாா்.

குலசேகரம், பேச்சிப்பாறை காவல் நிலைய எல்லைகளுக்கு உள்பட்ட பகுதிகளில் உள்ள வீடுகள், கடைகள், ரப்பா் உலா் நிலையங்கள் உள்பட 13 இடங்களிலிருந்து 47 முறை ரப்பா் ஷீட், ஒட்டுப்பால் உள்ளிட்டவையும், தொலையாவட்டம், நட்டாலத்தில் 2 பைக்குகள், குலசேகரம் அருகே கொல்லாறை பகுதியில் தோட்டத்தில் கட்டப்பட்ட ஆடு உள்ளிட்டவை திருடுபோயின. இதில், ரப்பா் ஷீட் மட்டும் சுமாா் 7 ஆயிரம் கிலோ திருடுபோனதாக புகாா்கள் வந்தன. இச்சம்பவங்களில் ஈடுபட்டவா் முகமூடி, கையுறை அணிந்திருப்பது கண்காணிப்புக் கேமரா பதிவுகள் மூலம் தெரியவந்தது.

அவரைக் கைதுசெய்ய தக்கலை டிஎஸ்பி கணேசன் உத்தரவின்பேரில் குலசேகரம் காவல் நிலைய ஆய்வாளா் உமா வழிகாட்டுதலில் உதவி ஆய்வாளா் முத்துகிருஷ்ணன் தலைமையில் தனிப்படை அமைக்கப்பட்டது.

புதன்கிழமை நள்ளிரவு பொன்மனை அருகே குற்றியாணி பகுதியில், பைக்கில் வந்த ஒருவா் தனிப்படையினரைப் பாா்த்ததும் பைக்கை போட்டுவிட்டு ரப்பா் தோட்டத்துக்குள் ஓடி ஒளிய முயன்றாா். அவரை போலீஸாா் விரட்டிப் பிடித்தனா்.

விசாரணையில், அவா் திற்பரப்பு நக்கறாண்டிவிளையைச் சோ்ந்த அச்சுதன் மகன் ஜெகன் (35) என்பதும், திற்பரப்பு, மாஞ்சக்கோணம், சூரியகோடு, அண்டூா், திருநந்திக்கரை உள்பட பல்வேறு இடங்களில் ரப்பா் ஷீட் உள்ளிட்டவற்றை திருடியதும் தெரியவந்தது. அவரை போலீஸாா் கைதுசெய்தனா்; அவா் திருடிய பொருள்களை மீட்கும் முயற்சியில் ஈடுபட்டுள்ளனா்.