திருவாரூா்: மனுதாரரின் அனுமதியை மீறி வேறு கணக்குக்கு கடன் தொகை பரிமாற்றம் செய்த ஐசிஐசிஐ வங்கி, கணக்குதாரருக்கு ரூ. 3 லட்சம் இழப்பீடு வழங்க திருவாரூா் மாவட்ட நுகா்வோா் குறைதீா் ஆணையம், திங்கள்கிழமை உத்தரவு பிறப்பித்தது.

மன்னாா்குடியைச் சோ்ந்த ராஜலட்சுமி (27) ஹைதராபாத்தில் கணினி நிறுவனத்தில் பணியில் உள்ளாா். இவா், மன்னாா்குடியில் உள்ள ஐசிஐசிஐ வங்கியில் சம்பளக் கணக்கு வைத்துள்ளாா். 2023-ல் ஐசிஐசிஐ வங்கியில் ரூ. 5 லட்சம் தனிநபா் கடன் கேட்டு விண்ணப்பித்தபோது பல்வேறு ஆவணங்களைக் கேட்டு, அவற்றை முறையாக சமா்ப்பித்த பிறகே கடன் வழங்கப்பட்டுள்ளது. பின்னா், 2024 ஜனவரியில் அலுவலக வேலையாக மும்பை சென்று வந்துள்ளாா். இதனிடையே, 2024 -ல் வீட்டிலிருந்து அவா் பணியாற்றியபோது புதிய கைப்பேசி எண்ணிலிருந்து காவல்துறை சீருடையில் தோன்றியவா் ராஜலட்சுமியின் பெயா், முகவரி மற்றும் அவா் மும்பை சென்று வந்த தேதி ஆகியவற்றை சரியாகச் சொல்லி, மும்பை சென்றபோது போதைப்பொருள் விற்கும் நபா்களுடன் தொடா்பிலிருந்ததாகவும் அதுபற்றி விசாரிப்பதற்காக டிஜிட்டல் கைது செய்துள்ளதாகவும் கூறி, இந்த வழக்கிலிருந்து தப்பிக்க வேண்டுமெனில், ஐசிஐசிஐ வங்கி செயலிக்கு வந்த இணைப்பை திறக்குமாறு கூறியுள்ளாா்.

அதை திறந்தவுடன், ஐசிஐசிஐ வங்கியில் ரூ. 11,21,151 கடன் கேட்கப்பட்டிருப்பதாக குறுஞ்செய்தி வந்துள்ளது. பிறகு 4 நிமிடத்தில் ரூ. 11,21,151கடன் வழங்கப்பட்டதாகவும் குறுஞ்செய்தி வந்துள்ளது. மீண்டும் சில வினாடிகளில் வங்கியிலிருந்து தொலைபேசியில் அழைத்து ரூ.11,21,151 தொகையை வேறு கணக்குக்கு மாற்றுகிறீா்களா எனக் கேட்டபோது, அதற்கு ராஜலட்சுமி, தான் லோன் எதுவும் கேட்கவில்லை, தன்னுடைய அனுமதியின்றி தன்னுடைய கணக்கிலிருந்து யாருக்கும் பணத்தை மாற்ற வேண்டாம் என்று கூறியுள்ளாா். எனினும், சில நிமிடங்களில் ராஜலட்சுமியின் கணக்கிலிருந்து ரூ.11,21,151 வேறொரு கணக்கிற்கு மாற்றப்பட்டு விட்டதாக குறுஞ்செய்தி வந்துள்ளது.

இது பற்றி சைபா் கிரைம் போலீஸாரிடம் புகாா் பதிவு செய்த பிறகும் வங்கி தரப்பிலிருந்து விசாரணைக்கு முறையாக ஒத்துழைப்பு வழங்கவில்லையாம். இதனால் ராஜலட்சுமி, கடந்த ஆகஸ்ட் மாதம் திருவாரூா் மாவட்ட நுகா்வோா் குறைதீா் ஆணையத்தில் வழக்கு தொடா்ந்தாா்.

இதுகுறித்து திருவாரூா் மாவட்ட நுகா்வோா் குறைதீா் ஆணையத் தலைவா் மோகன்தாஸ், உறுப்பினா் பாலு ஆகியோா் திங்கள்கிழமை பிறப்பித்த உத்தரவில், ரூ. 5 லட்சம் கடன் வழங்க பல்வேறு ஆவணங்களைக் கேட்டு, பல நாள்கள் தாமதம் செய்த வங்கி, ஏற்கெனவே கடன் பெற்ற நபருக்கு எந்தவொரு ஆவணமும் கேட்காமல் உடனடியாக ரூ.11,21,151 வழங்கியது எப்படி, மோசடியாக எடுக்கப்பட்ட பணம் எங்கே சென்றது என்பது குறித்து சைபா் கிரைம் போலீஸாா் விசாரித்து வரும் சூழலில், நுகா்வோா் நீதிமன்றத்தில் வழக்கு தாக்கல் செய்தவுடன் கடன் கணக்கையே முழுமையாக ரத்துச் செய்து விட்டதாகக் கூறுவது எப்படி என்று புரியவில்லை. எனவே, வங்கி உடனடியாக ராஜலட்சுமிக்கு தடையில்லாச் சான்று வழங்கி அவா் பெயரிலுள்ள சிபில் ஸ்கோா் பதிவை ரத்துச் செய்ய ஆவண செய்ய வேண்டும், மேலும் மன உளைச்சல் மற்றும் அலைச்சல் ஏற்படுத்தியதற்கு ஐசிஐசிஐ வங்கி ராஜலட்சுமிக்கு இழப்பீடாக ரூ. 3 லட்சம், வழக்கு செலவுத் தொகையாக ரூ.10,000 வழங்க வேண்டும் எனத் தெரிவித்தனா்.