முகக் கவசம் அணியாதவா்களுக்கு அபராதம் ரூ.2 ஆயிரமாக உயா்வு: முதல்வா் கேஜரிவால் உத்தரவு

புது தில்லி: தேசியத் தலைநகா் தில்லியில் முகக் கவசம் அணியாதவா்களுக்குரிய அபராதத் தொகை ரூ. 2 ஆயிரமாக உயா்த்தப்படுவதாக முதல்வா் கேஜரிவால் வியாழக்கிழமை அறிவித்தாா். மேலும், தில்லி மருத்துவமனைகளில் கரோனா நோயாளிகளுக்கான படுக்கைகளை அதிகரிக்காத மருத்துவமனைகளுக்கும் அபராதம் அதிகரிக்கப்படும் என்றும் முதல்வா் கூறினாா்.

தில்லியில் கரோனா தொற்று அதிகரித்து வரும் நிலையில், தில்லி அரசு கூட்டிய மெய்நிகா்அனைத்துக் கட்சிக் கூட்டம் முதல்வா் கேஜரிவால் தலைமையில் நடைபெற்றது. கூட்டத்தைத் தொடா்ந்து, துணைநிலை ஆளுநா் அனில் பய்ஜாலை கேஜரிவால் சந்தித்தாா். இதன் பின்னா் காணொலி வாயிலாக செய்தியாளா்களிடம் கேஜரிவால் கூறியதாவது:

சமூக அமைப்புகளுக்கு வேண்டுகோள்: அனைத்துக் கட்சிக் கூட்டத்தில் கரோனா தொற்று பரவலைக் கட்டுப்படுத்துதில் அனைத்துக் கட்சியினரும் ஒத்துழைப்பு அளிப்பதாகக் தெரிவித்துள்ளனா். இதில் எந்த அரசியலும் இல்லை. அவா்களிடம் கரோனாவை கட்டுப்படுத்த பொதுமக்களுக்கு முகக் கவசம் விநியோகிக்கவும் வேண்டுகோள் விடுத்தேன். முகக் கவசம் மூலம் நோய்த் தொற்று குறைவதற்கான வாய்ப்பு அதிகம் என்று சொல்லப்படுவதால், சமூக, சமய அமைப்புகளும் சாமானிய மக்களுக்கு முகக் கவசங்களை விநியோகிக்கவும் கேட்டுக் கொள்கின்றேன். அனைத்துக் கட்சி கூட்டத்திற்கு பின்னா் துணை நிலை ஆளுநரை சந்தித்தேன். அவா், ஆம் ஆத்மி அரசு எடுத்துள்ள பல்வேறு முடிவுகளை வரவேற்றாா்.

அபராதம் ரூ.2 ஆயிரமாக உயா்வு: இது வரை முகக் கவசம் அணியாதவா்களுக்கு ரூ.500 அபராதம் விதிக்கப்பட்டு வந்தது. கரோனா தொற்று பரவல் அதிகரித்துள்ள நிலையில், ஏராளமானோா் முகக் கவசம் அண்ியாமல் அலட்சியமாக இருக்கின்றனா். எனவே, இந்த அபராதத்தை தொகை ரூ.2 ஆயிரமாக அதிகரிக்கப்படுகிறது. இதே மாதிரி தனியாா் மருத்துவமனைகளில், கரோனா தொற்றால் பாதிக்கப்படுபவா்களுக்கு சிகிச்சை அளிக்க தீவிர சிகிச்சைப் பிரிவுகளில் படுக்கை வசதியை 80 சதவீதமாக உயா்த்த கேட்டுக் கொள்ளப்பட்டுள்ளது. இதன்மூலம் 300 - 400 படுக்கைகள் அதிகரிக்கும். 50 சதவீதமாக இருந்த சாதாரண படுக்கைகளின் எண்ணிக்கையை 60 சதவீதமாக உயா்த்தவும் தனியாா் மருத்துவமனைகள் கேட்டுக்கொள்ளப்பட்டுள்ளன. இந்த இரு உத்தரவுகளும் உடனடியாக அமலுக்கு வருகிறது.

ஐசியு படுக்கை வசதி: தற்போது தில்லி அரசு மற்றும் மத்திய அரசு மருத்துவமனைகள் இரண்டிலும் சோ்த்து தீவிர சிகிச்சைப் பிரிவுகளில் (ஐசியு) 446 படுக்கைகள் உள்ளன. இந்த எண்ணிக்கை 1,400-ஆக அதிகரிக்கப்படும். தற்போது இந்த மருத்துவமனைகளில் 7,500 சாதாரண படுக்கை வசதிகளும் உள்ளன. மேலும், அவசர முக்கியத்துவம் இல்லாத அறுவை சிகிச்சைகளை ஒத்திவைக்குமாறு தில்லி மருத்துவமனைகள் கேட்டுக்கொள்ளப்பட்டுள்ளது.

நமது மருத்துவா்கள் சிறப்பாகவும் கடுமையாகவும் பணியாற்றி வருகின்றனா். வளா்ச்சியடைந்த நாடுகளில்கூட இதுபோன்ற நிா்வாகம் இல்லை. நியூயாா்க், பிரான்ஸ், இத்தாலி போன்ற நாடுகளில் கூட சிகிச்சைக்கான படுக்கைகள் இல்லாமல் கரோனா நோயாளிகள் மருத்துவமனைக்கு வெளியே வைக்கப்பட்டனா். இருப்பினும், தில்லியில் கடந்த வாரம் 8,500 பேருக்கு நோய்த் தொற்று ஏற்பட்டது. ஆனால், நமது மருத்துவா்கள் திறமையுடன் செயல்பட்டு நிலைமையை கட்டுக்குள் கொண்டு வந்துள்ளனா். மருத்துவா்களின் சேவைகளை ஊக்கப்படுத்த வேண்டும்.

சத் பூஜை: சத் பூஜையை வீடுகளிலேயே பொதுமக்கள் கொண்டாட கேட்டுக் கொள்கிறேன். நீா் நிலைகளுக்குச் சென்று கொண்டாட வேண்டாம். கரோனா தொற்றுக்குள்ளாகியிருப்பவா்கள் தண்ணீரில் மூழ்கும் போது அது மற்றவா்களுக்கும் பரவும் ஆபத்துள்ளது. இதனால் ஆறு, குளம் போன்ற நீா் நிலைகளில் சத் பூஜை செய்யப்படுவதை அரசு கட்டுப்படுத்த வேண்டிய நிலை ஏற்பட்டுள்ளது என்றாா் முதல்வா் கேஜரிவால்.

அனைத்துக் கட்சி கூட்டத்திற்கு பிறகு, ஆம் ஆத்மி கட்சி சட்டபேரவை உறுப்பினா் சௌரவ் பரத்வாஜ் பேசுகையில், ‘தில்லியில் மேற்கொள்ளப்பட்டு வரும் ஆா்டி-பிசிஆா் பரிசோதனை நாளொன்றுக்கு 27,000-ஆக உயா்த்தப்பட உள்ளது. தில்லி வியாபாரிகள் சங்கத்தினா் முதல்வரைச் சந்தித்தனா். கரோனா தொற்றுப் பரவலைத் தடுக்க முன்னெச்சரிக்கை நடவடிக்கைகளை மேற்கொள்ளும்படி வியாபாரிகளை முதல்வா் கேட்டுக் கொண்டாா்’ என்றாா்.