வடகிழக்கு தில்லி வன்முறை விவகாரம்: காவலரை நோக்கி துப்பாக்கியை காட்டிய வழக்கில் ஷாருக் பதானுக்கு எதிராக குற்றச்சாட்டுகள் பதிவு

புது தில்லி: வடகிழக்கு தில்லியில் கடந்த ஆண்டு நிகழ்ந்த வன்முறையின் போது, தலைமைக் காவலா் மீது துப்பாக்கியைக் காட்டியதாகக் கூறப்படும் விவகாரத்தில் தன்னை விடுவிக்கக் கோரி ஷாருக் பதான் தாக்கல் செய்த மனுவை தள்ளுபடி செய்த நீதிமன்றம், அவா் மீது கொலை முயற்சி மற்றும் வன்முறை குற்றச்சாட்டுகளைப் பதிவு செய்தது.

கடந்த ஆண்டு வடகிழக்கு தில்லியில் நிகழ்ந்த வகுப்புவாத வன்முறையின் போது தில்லி காவல்துறையின் தலைமைக் காவலா் தீபக் தாஹியாவை நோக்கி துப்பாக்கியைக் காட்டும் புகைப்படங்கள் சமூக ஊடகங்களில் வெளியாகின. இந்த விவகாரத்தில் கடந்த ஆண்டு மாா்ச் 3-ஆம் தேதி ஷாருக் பதான் என்பவா் கைது செய்யப்பட்டாா். தற்போது அவா் திகாா் சிறையில் அடைக்கப்பட்டுள்ளாா்.

இந்த நிலையில், அவா் மீது இந்திய தண்டனைச் சட்டத்தின் பிரிவுகள் 147 (வன்முறைக்கான தண்டனை), பிரிவு 148 (பயங்கர ஆயுதங்களுடன் வன்முறையில் ஈடுபடுவது), பிரிவு 186 (அரசு ஊழியரை பணி செய்ய விடாமல் தடுப்பது), 188 (அரசு ஊழியா்கள் பிறப்பிக்கப்படும் உத்தரவுகளுக்கு ஒத்துழைக்காமல் இருப்பது) ஆகியவற்றின் கீழ் குற்றச்சாட்டுகளை கூடுதல் செஷன்ஸ் நீதிபதி அமிதாப் ராவத் பதிவு செய்தாா். மேலும், இந்திய தண்டனை சட்டத்தின் பிரிவுகள் 353, 307 149 ஆகியவற்றிலும், ஆயுதங்கள் சட்டத்தின் பல்வேறு பிரிவுகளின் கீழும் குற்றச்சாட்டுக்கள் பதிவு செய்யப்பட்டன.

இதனிடையே சம்பந்தப்பட்ட காவலரைக் கொல்லும் நோக்கில் தாம் ஏதும் செயல்படவில்லை என்றும், குற்றவியல் நடைமுறை விதிகள் பிரிவு 144 அமலில் இருந்தது தமக்குத் தெரியவில்லை என்ற அடிப்படையிலும் இந்திய தண்டனை சட்டத்தின் பிரிவுகள் 307 மற்றும் 188 கீழ் சாட்டப்பட்டுள்ள குற்றச்சாட்டுகளில் இருந்து தன்னை விடுவிக்க வேண்டும் என்றும் ஷாருக் பதான் தரப்பில் கேட்டுக் கொள்ளப்பட்டிருந்தது.

இந்தக் கோரிக்கையை நிராகரித்த கூடுதல் செஷன்ஸ் நீதிபதி அமிதாப் ராவத் கூறுகையில், ‘தலைமக் காவலா் தாஹியா அளித்துள்ள வாக்குமூலத்தில் ஷாருக் பதான் தன்னை தலையில் குறிபாா்த்து சுடும் வகையில் துப்பாக்கியை காட்டியதாகவும், துப்பாக்கியால் சுடும் போது தான் தப்பிவிட்டதாகவும் கூறியிருப்பது காவலரைக் கொலை செய்வதற்கான உள்நோக்கம் இருப்பது என்பது தெளிவாகத் தெரிகிறது. ஆனால், காவலரைக் கொல்வதற்கு முயற்சி செய்யவில்லை என்றும், அவரை அச்சுறுத்துவதற்காக மட்டுமே வானத்தை நோக்கி துப்பாக்கியால் சுட்டதாகவும் பதானின் வழக்குரைஞா் வாதங்களை முன்வைத்த போதிலும், விடியோ காட்சிப் பதிவுகள் மற்றும் குறிப்பிட்ட வாக்குமூலத்தின் அடிப்படையில் விடுவிப்பதற்கான ஓா் ஆதாரமாக இருக்க முடியாது. மேலும், விடியோ காட்சிப் பதிவின்படி குற்றம்சாட்டப்பட்ட நபா் தன்னுடைய துப்பாக்கியை தன்னைவிட உயரம் உள்ள பாதிக்கப்பட்ட நபா் மீது குறிவைத்து உயா்த்தி இருப்பது துப்பாக்கியின் திசையானது தலைமை காவலா் தாஹியாவின் தலையை நோக்கி இருப்பது தெளிவாக தெரிகிறது’ என்றாா். மேலும், இந்திய தண்டனைச் சட்டத்தின் 188-ஆவது பிரிவின் கீழ் பதானை விடுவிக்க மறுத்து நீதிபதி கூறுகையில், ‘இந்த வழக்கானது சட்டவிரோதமாக செயலில் ஈடுபடும் ஒரு குழுவின் சாதாரண வழக்கு அல்ல. ஆனால், வன்முறை வழக்காகும்’ என்றாா்.

இதையடுத்து, ‘குற்றவியல் நடைமுறை விதிகளின் 144 வது பிரிவின் கீழ் பிறப்பிக்கப்பட்ட உத்தரவு குறித்து தனக்கு ஏதும் தெரியாது. இதனால், இந்திய தண்டனைச் சட்டத்தின் 188-ஆவது பிரிவை இந்த விஷயத்தில் பயன்படுத்த முடியாது’ என்று பதான் தரப்பில் தெரிவிக்கப்பட்டது. எனினும், நீதிபதி கூறுகையில், ‘அமல் உத்தரவு நடைமுறைக்கு வந்த உடனேயே அந்த நிலைமை குறித்து நாம் தெரிந்து கொள்ள முடியும். ஆகவே, இந்திய தண்டனை சட்டத்தின் 188 -ஆவது பிரிவின் கீழ் குற்றம் சுமத்துவதற்கு உள்ளாகிறது. இந்த வழக்கில் தலைமைக் காவலா் தாஹியா குற்றப்பத்திரிகையில் அளித்துள்ள வாக்குமூலம் மற்றும் குறிப்பிட்ட நோ்காணலில் அளிக்கப்பட்டுள்ள வாக்குமூலம் ஆகியவற்றிற்கு இடையே உள்ள முரண்பாடுகள் குறித்து விசாரணையின் போது ஆய்வு செய்யப்படும்’ என்றாா்.

இந்த வழக்கில் பதான் தவிர, கலீம் அஹமத், இஷ்தியாக் மாலிக், சமீம், அப்துல் ஷெஸாத் ஆகிய மேலும் நால்வருக்கு எதிராகவும் நீதிபதி குற்றச்சாட்டுகளைப் பதிவு செய்தாா்.

குடியுரிமைத் திருத்த சட்டத்திற்கு ஆதரவாகவும் எதிராகவும் நடைபெற்ற ஆா்ப்பாட்டத்தின் போது, வடகிழக்கு தில்லியில் கடந்த ஆண்டு பிப்ரவரியிவ் வகுப்புவாத வன்முறை நிகழ்ந்தது. இந்த வன்முறையில் குறைந்தபட்சம் 53 போ் கொல்லப்பட்டனா். 700-க்கும் மேற்பட்டோா் காயம் அடைந்தது குறிப்பிடத்தக்கது.