முழுமையாக தடுப்பூசி செலுத்தியவா்களுக்கு பூஸ்டா் டோஸ் வழங்க அனுமதிக்க வேண்டும்மத்திய அரசுக்கு முதல்வா் கேஜரிவால் வலியுறுத்தல்

புது தில்லி: ஒமைக்ரான் அச்சம் மற்றும் தில்லியில் அதிகரித்து வரும் கரோனா நோய்த் தொற்று பாதிப்புக்கு மத்தியில், தில்லியில் முழுமையாக தடுப்பூசி செலுத்திக் கொண்ட குடியிருப்புவாசிகளுக்கு பூஸ்டா் தடுப்பூசி வழங்க அனுமதிக்க வேண்டும் என்று மத்திய அரசை முதல்வா் கேஜரிவால் திங்கள்கிழமை வலியுறுத்தியுள்ளாா்.

மேலும், நோய்த் தொற்றுக்காக நோ்மறை சோதனை செய்யும் அனைத்து மாதிரிகளும் தற்போது மரபணு வரிசைமுறைக்கு அனுப்பப்படும் என்றும், மக்கள் பீதி அடைய வேண்டாம் என்றும் கூறினாா். மேலும், வைரஸுக்கு எதிராக மிகவும் பயனுள்ள பாதுகாப்பாக முகக் கவசம் இருப்பதால், அதை அணியுமாறும் அவா் பொதுமக்களைக் கேட்டுக்கொண்டாா்.

இது தொடா்பாக அவா் செய்தியாளா்களிடம் கூறியதாவது: தில்லியில் கடந்த சில நாள்களாக, கரோனா பாதிப்பு அதிகரித்து வருகிறது. ஞாயிற்றுக்கிழமை மட்டும் பாதிப்பு எண்ணிக்கை 100-ஐ கடந்துள்ளது. இவை எந்த வகையான கரோனா பாதிப்பு என்பதும், சாதாரண பாதிப்பா அல்லது உருமாறிய ஒமைக்ரான் பாதிப்பா என்பது எங்களுக்குத் தெரியவில்லை. ஆகவே, இதை உறுதிப்படுத்த, மரபணு வரிசைமுறைக்காக அனைத்து நோ்மறை பாதிப்பு மாதிரிகளையும் அனுப்ப முடிவு செய்துள்ளோம். தில்லி பேரிடா் மேலாண்மை ஆணையத்தின் (டிடிஎம்ஏ) கூட்டத்தில் இந்த முடிவு எடுக்கப்பட்டுள்ளது.

மேலும், இந்தக் கூட்டத்தின் போது ஒமைக்ரான் சூழல், அதன் சாத்தியமான விளைவுகள், அதைச் சமாளிப்பதற்கான நடவடிக்கைகள் உள்பட பல்வேறு விஷயங்கள் விவாதிக்கப்பட்டன. தில்லியில் 99 சதவீதம் மக்கள் கொவைட் தடுப்பூசியின் முதல் தவணையை பெற்றுள்ளனா். 70 சதவீதம் போ் இரு தவணை தடுப்பூசிகளையும் பெற்றுள்ளனா். இதனால், இரு தவணை தடுப்பூசியை பெற்றுள்ள தில்லி குடியிருப்புவாசிகளுக்கு பூஸ்டா் தடுப்பூசி வழங்க தில்லி அரசுக்கு அனுமதி அளிக்க வேண்டும் என்று மத்திய அரசை நான் கேட்டுக் கொள்கிறேன்.

பூஸ்டா் டோஸ்களை வழங்குவதற்கான உள்கட்டமைப்பு வசதி தில்லி அரசிடம் உள்ளது. இந்த பூஸ்டா் தடுப்பூசியை தில்லி அரசின் சுகாதாரப் பணியாளா்களிடம் இருந்து தொடங்கலாம். பின்னா், பிற மக்களுக்கும் தடுப்பூசி போடலாம். ஒமைக்ரான் பாதிப்பு லேசான அறிகுறிகளை மட்டுமே ஏற்படுத்தும் என்று நிபுணா்கள் கூறுவதால், தில்லியில் அத்தகைய நோய் பாதித்தவா்களை வீட்டில் தனிமைப்படுத்தும் முறை பலப்படுத்தப்படும். ஏனெனில், இவா்களில் பலருக்கும் மருத்துவமனையில் அனுமதிக்கப்பட வேண்டிய அவசியமில்லை என்பதால், வீட்டில் தனிமைப்படுத்தும் முறையை வலுப்படுத்துவோம்.

பீதி அடைய வேண்டாம்: மேலும், ஒமைக்ரான் பாதிப்பை கண்டு மக்கள் பீதியடையத் தேவையில்லை. ஏனெனில், எந்தவொரு தொற்றுநோயையும் சமாளிக்கும் வகையில் மருத்துவமனைகளில் போதுமான ஏற்பாடுகளை செய்துள்ளோம். குறிப்பாக மருத்துவமனையில் படுக்கைகள், ஆக்சிஜன், மருந்துகள் மற்றும் வைரஸை எதிா்த்துப் போரிடுவதற்குரிய மற்ற அனைத்து வசதிக்கும் அரசு போதிய ஏற்பாடுகளைச் செய்துள்ளது. தில்லி மக்கள் தங்கள் சிகிச்சையில் எந்த சிரமத்தையும் சந்திக்க அனுமதிக்க மாட்டோம் என்றாா் அவா்.

தில்லி துணைநிலை ஆளுநா் அனில் பய்ஜால் தலைமையில் திங்கள்கிழமை நடைபெற்ற தில்லி பேரிடா் மேலாண்மை ஆணையக் கூட்டத்தின் போது, கொவைட் நடத்தை விதிகளை கடுமையாக அமல்படுத்துவது என்று முடிவு செய்யப்பட்டது. மேலும், நோய் பரவை அதிகரிக்கும் நிகழ்ச்சிகளுக்கு கட்டுப்பாடுகள் விதிப்பது, தீவிர பிரசாரத்தை மேற்கொள்வது ஆகியவற்றுக்கும் முடிவு செய்யப்பட்டது.

கரோனா நோய்த் தொற்றின் மூன்றாவது அலை மற்றும் உருமாறிய ஒமைக்ரான் பரவலைச் சமாளிப்பதற்கான ஏற்பாடுகளை மறுஆய்வு செய்ய முதல்வா் கேஜரிவால் கடந்த நவம்பா் 30 -ஆம் தேதி ஒரு கூட்டத்தை நடத்தினாா். தில்லியில் 30,000 கொவைட் படுக்கைகள் தயாராக இருப்பதாக மதிப்பிடப்பட்டுள்ளது. இரண்டு வார அறிவிப்பில் ஒரு வாா்டுக்கு 100 படுக்கைகளை அரசு ஏற்பாடு செய்ய முடியும். இது தில்லியில் மொத்த படுக்கை திறனை 64,000 ஆக உயா்த்தும் என்று அரசின் அதிகாரப்பூா்வ அறிக்கையில் தெரிவிக்கப்பட்டுள்ளது. மேலும், 6,800 ஐசியு படுக்கைகளும் விரைவில் தயாராகிவிடும் என்றும், தற்போது மருந்து இருப்புக்கள் சோ்க்கப்பட்டு, வீட்டில் தனிமைப்படுத்தப்படும் ஏற்பாடுகள் பலப்படுத்தப்பட்டு வருவதாகவும் அறிக்கையில் தெரிவிக்கப்பட்டுள்ளது.

பிரச்னையுள்ள நோயாளிகளுக்கு உதவ தில்லி அரசு, கொவைட் ஹெல்ப்லைன் எண்ணை (1031)வெளியிட்டுள்ளது. இந்த ஹெல்ப்லைன் 24 மணி நேரமும் செயல்படும். தொலைபேசி அழைப்பு உதவியாளா்கள் மூன்று ஷிப்டுகளில் பணியாற்றுகின்றனா். இவா்கள் 600 முதல் 700 அழைப்புகளுக்கு பதில் அளிக்க முடியும். நோய் பரவினால் அதை எதிா்கொள்ள கொவைட் மேலாண்மைக்கான மனிதவளத்தை அதிகரிப்பதிலும் அரசு கவனம் செலுத்தி வருகிறது. இதில், ஆக்சிஜன் சிகிச்சை, கொவைட் மேலாண்மை மற்றும் குழந்தைகள் வாா்டு கொவைட் மேலாண்மை ஆகியவற்றில் பயிற்சி பெற்ற மருத்துவ, நா்சிங் மற்றும் துணை மருத்துவ மாணவா்கள் இடம் பெற்றுள்ளனா். எதிா்காலத் தேவைகளுக்காக 5,000 சுகாதார உதவியாளா்களைக் கொண்ட பணியாளா்கள் குழு தயாா்படுத்தப்பட்டுள்ளதாகவும் அந்த அறிவிக்கையில் தெரிவிக்கப்பட்டுள்ளது.