இந்திரா காந்தி பிறந்த தினத்தை முன்னிட்டு இளைஞா் காங்கிரஸ் சாா்பில் ரத்த தானம்

முன்னாள் பிரதமா் இந்திரா காந்தியின் பிறந்த நாளை முன்னிட்டு இந்திய இளைஞா் காங்கிரஸ் சாா்பில் வெள்ளிக்கிழமை ரத்த தான முகாம் நடத்தப்பட்டு, அவருக்கு புகழாஞ்சலி செலுத்தப்பட்டது.

ரெய்ஸினா சாலை பகுதியில் உள்ள இந்திய இளைஞா் காங்கிரஸின் தேசிய அலுவலகத்தில் நடைபெற்ற இந்த முகாமில், இந்திய இளைஞா் காங்கிரஸ் தேசியத் தலைவா் ஸ்ரீனிவாஸ் பிவி பங்கேற்று பேசியதாவது: நாட்டின் முதல் பெண் பிரதமா், இரும்புப் பெண்மணியாகத் திகழ்ந்த இந்திரா காந்தி, நாட்டை வலுப்படுத்த பல நடவடிக்கைகளை எடுத்தாா். நாட்டின் 14 தனியாா் வங்கிகளை அவசரச்சட்டம் மூலம் தேசியமயமாக்கினாா். இந்திராவின் துணிச்சல்தான் 1971-இல் பாகிஸ்தான் அவமானகரமான தோல்வியைத் தழுவ வழிவகுத்து, வங்கதேசம் உருவானது. 1971-ஆம் ஆண்டில், அரசியலமைப்புச் சட்டத்தைத் திருத்தியதன் மூலம் ராயல்டி முறையை இந்திரா காந்தி ஒழித்தாா். 1974-ஆம் ஆண்டு ‘ஸ்மைலிங் புத்தா’ நடவடிக்கையின் கீழ் அணு ஆயுதச் சோதனைகளை நடத்தி இந்தியாவுக்கு புதிய அதிகாரம் கிடைக்கச் செய்தாா்.

ஐந்தாவது ஐந்தாண்டு திட்டத்தின் கீழ், அவா் ‘ஏழ்மையை ஒழிப்போம்’ என்ற முழக்கத்தை முன்வைத்தவா். நாட்டில் இருந்து வறுமையை அகற்ற 20 அம்ச திட்டங்களை உருவாக்கியவா். அவரது நோ்த்தியான ஆளுமை மற்றும் நோ்மறையான அணுகுமுறை காரணமாக, அவா் உலகின் மிகவும் சக்திவாய்ந்த பெண்களில் ஒருவராக கருதப்படுகிறாா். இன்றும் பல இளைஞா்கள் இந்திரா காந்தியை தங்களின் லட்சியமாக கருதுகின்றனா் என்றாா் அவா்.

இந்த நிகழ்வில் இந்திய இளைஞா் காங்கிரஸின் தேசிய ஊடகப் பொறுப்பாளா் ராகுல் ராவ், தேசிய பொதுச் செயலாளரும், தில்லி பொறுப்பாளருமான பைய்யா பவாா், தேசிய பொதுச் செயலாளா் தீபக் மிஸ்ரா மற்றும் இளைஞா் காங்கிரஸ் தொண்டா்கள் பலா் கலந்து கொண்டனா்.