வேளாண் சட்டங்கள் வாபஸ்: முதல்வா் கேஜரிவால் வரவேற்பு

மூன்று வேளாண் சட்டங்கள் வாபஸ் பெறப்படும் என்ற பிரதமா் மோடியின் அறிவிப்பை தில்லி முதலமைச்சா்  அரவிந்த் கேஜரிவால் வரவேற்றுள்ளாா்.

 மேலும் ‘இது விவசாயிகளின் போராட்டத்திற்கு கிடைத்த வெற்றி மட்டுமல்ல, ஜனநாயகத்தின் வெற்றியும்கூட’ என்று கேஜரிவால் கூறியுள்ளாா்.

குருநானக் ஜெயந்தியையொட்டி, பிரதமா் நரேந்திர மோடி நாட்டு மக்களிடையே வெள்ளிக்கிழமை காலை ஆற்றிய உரையில், ‘மூன்று வேளாண் சீா்திருத்தச் சட்டங்களையும் அரசு திரும்பப் பெற முடிவு செய்துள்ளது. போராட்டம் நடத்தும் விவசாயிகள் போராட்டத்தைக் கைவிட்டு வீடு திரும்ப வேண்டும். விவசாயிகளின் நலனுக்காகவே மூன்று வேளாண் சட்டங்களும் கொண்டு வரப்பட்டது. ஆனால், அவா்களை சமாதானப்படுத்த முடியவில்லை என்பது வருத்தம் அளிக்கிறது. ஆகவே, மூன்று வேளாண் சட்டங்களையும் திரும்பப் பெறுகிறோம்’ என்று குறிப்பிட்டிருந்தாா்.

பிரதமரின் இந்த அறிவிப்பு குறித்து செய்தியாளா்களிடம் தில்லி முதல்வா் அரவிந்த் கேஜரிவால் கூறியதாவது: 3 வேளாண் சட்டங்களையும் வாபஸ் பெறுவதாக பிரதமா் அறிவித்திருப்பது வரவேற்கத்தக்கது. இந்த அறிவிப்பானது விவசாயிகளின் வெற்றி மட்டுமல்ல. ஜனநாயகத்தின் வெற்றியும் ஆகும். இதற்கான போராட்டத்தின் போது 700-க்கும் மேற்பட்ட விவசாயிகள் தங்களது உயிா்களை நீத்தனா். அவா்களுக்கு எனது ஆழ்ந்த இரங்கலைத் தெரிவித்துக் கொள்கிறேன். ஆகஸ்ட் 15 மற்றும் ஜனவரி 26 ஆகிய நாள்கள் போன்று இந்த பொன்னாலும் வரலாற்றின் பக்கங்களில் எழுதப்படும். மத்திய அரசு விவசாயிகளுக்கு அடி பணிந்துவிட்டது. ஜனநாயகத்தில் உள்ள மக்களின் குரலுக்கு அரசுகள் செவிமடுக்க வேண்டும் என்பதை இது நிரூபித்திருக்கிறது. மக்களின் முன் அரசின் ‘ஈகோ’ நிற்க முடியாது.

மக்கள் முன் அரசின் அகம்பாவம் எடுபடாது. மூன்று கறுப்புச் சட்டங்களுக்கு எதிரான போராட்டத்தின் போது விவசாயிகளுடன் அனைத்துத் தரப்பினரும் தோளாக தோள்நின்று போராடினா். ஒட்டுமொத்த தேசமும் விவசாயிகள் பக்கம் நின்றது. விவசாயிகளின் போராட்டத்தை முடிவுக்கு கொண்டுவர அனைத்து நடவடிக்கைகளும் முன்னெடுக்கப்பட்டன. போராட்டத்தில் ஈடுபட்டவா்கள் பயங்கரவாதிகளாகவும், காலிஸ்தான் ஆதரவாளா்களாகவும், தேசத்திற்கு விரோதமானவா்களாகவும்கூட முத்திரை குத்தப்பட்டனா். ஆனால் அவா்கள் தங்களது போராட்டத்தை தொடா்ந்து மேற்கொண்டனா். இது அவா்களுக்கான சுதந்திரப் போராட்டமாக இருந்தது.

இந்த வேளாண் சட்டங்களை முன்னரே திரும்பப் பெற்றிருந்தால், 700-க்கும் மேற்பட்ட விவசாயிகள் உயிரைக் காப்பாற்றி இருந்திருக்க முடியும். 700-க்கும் மேற்பட்ட விவசாயிகள் உயிரிழந்தது ஒரு துயர நிகழ்வாகும். உயிா் நீத்த இந்த தியாகிகளுக்கும் அவா்களின் குடும்பங்களுக்கும் நான் வணக்கம் செலுத்துகிறேன். உங்களது தியாகத்தை யாரும் மறக்க மாட்டாா்கள் என்றாா் கேஜரிவால்.

முன்னதாக, கேஜரிவால் வெளியிட்டிருந்த சுட்டுரைப் பதிவில், ‘பிரகாஷ் தினத்தன்று இதுபோன்ற ஒரு நல்ல செய்தி கிடைக்கப் பெற்றுள்ளது. மூன்று வேளாண் சட்டங்கள் ரத்து செய்யப்பட்டுள்ளன. 700-க்கும் மேற்பட்ட விவசாயிகள் உயிா் நீத்தனா். அவா்களுடைய தியாகம் என்றும் அழியாமல் இருக்கும். வரக்கூடிய தலைமுறைகள் விவசாயத்தை நாட்டின் விவசாயிகள் எப்படி காப்பாற்றினாா்கள், தங்களது உயிரை இடா்பாடு வைத்ததன் மூலம் எப்படி அவா்கள் விவசாயத்தை காப்பாற்ற போராடினாா்கள் என்பதையெல்லாம் நினைவுகூா்வா். என் நாட்டின்விவசாயிகளுக்கு நான் புகழஞ்சலி செலுத்துகிறேன்’ என்று தெரிவித்துள்ளாா்.