உ.பி. முதல்வா் யோகி ஆதித்ய நாத் பெயரில் போலி கடிதம் பத்திரிகையாளா் கைது

உத்தர பிரதேசம் முதல்வா் யோகி ஆதித்யநாத் பெயரில் போலி மின்னஞ்சல் அனுப்பி தனது செய்தித்தாளுக்கு அரசு பொது நிறுவனங்களில் விளம்பரம் பெற முயன்ற பத்திரிகையாளா் ஒருவா் கைது செய்யப்படதாக தில்லி போலீஸாா் தெரிவித்தனா்.

உ.பி. முதல்வா் ஆதித்ய நாத் கோரக்பூா் மக்களவை எம்.பி.யாக இருந்த போது அளிக்கப்பட்ட புகாரில் நீண்ட நாள் தேடப்பட்டவா் தற்போது சிக்கியுள்ளாா். தேடப்பட்ட மனோஜ் குமாா் சேத் (41) என்கிற அந்தப் பத்திரிகையாளர் தில்லி காவல்துறையின் ஐஎஃப்எஸ்ஒ என்கிற சிறப்புப் பிரிவு போலீஸாரால் ஒடிஸா மாநிலம், புவனேஷ்வரில் கைது செய்யப்பட்டாா். அடையாளம் தெரியாத நபா்கள் ஆதித்யநாத்தின் போலி மின்னஞ்சல் ஐடியை உருவாக்கி கடிதம் அனுப்பி வருவதாக ஆதித்யநாத்தின் தனிப்பட்ட செயலாளரான ராஜ்பூஷண் சிங் ராவ், காவல்துறையில் புகாா் அளித்திருந்தாா்.

இந்த நபா்கள் பவா் கிரிட் காா்ப்பரேஷன் ஆஃப் இந்தியா, ஓஎன்ஜிசி மற்றும் கெயில் இந்தியா போன்ற பொதுத் துறை நிறுவனங்களுக்கு மின்னஞ்சல்கள் மற்றும் போலி கடிதங்களை அனுப்பியுள்ளனா் என்றும் குற்றம் சாட்டப்பட்டவா்கள் ஆதித்ய நாத்தின் போலி கையெழுத்துடன் ஸ்கேன் செய்யப்பட்ட கடிதங்களையும் அனுப்பியுள்ளனா் எனவும் புகாரில் தெரிவிக்கப்பட்டிருந்தது.

இது குறித்து விசாரணை நடத்தி புலன்விசாரணை மேற்கொண்ட ஐஎஃப்எஸ்ஒ பிரிவின் காவல் துணை ஆணையா் கேபிஎஸ் மல்ஹோத்ரா கூறுகையில், ‘விசாரணையின் போது, ​​ போலி மின்னஞ்சல் ஐடி அடையாளம் காணப்பட்டது. உள்நோக்கத்தைப் புரிந்து கொள்ள அதன் உள்ளடக்கங்கள் பகுப்பாய்வு செய்யப்பட்டன. ‘ஆங்கில நாளிதழ் ஒன்றிற்கு ஆதரவாக விளம்பரங்களைப் பெற வேண்டும் என்ற கோரிக்கையுடன் அந்த மின்னஞ்சல் இருந்தது. இதே போல, போலி மின்னஞ்சல்கள் மற்றும் போலி கடிதங்கள் ஒரு செய்தித்தாளின் விளம்பர ஆதரவுக்காக இந்த மத்திய அரசின் நிறுவனங்களுக்கு அனுப்பப்பட்டு இருந்தன. ஐபி (இன்டா்நெட் புரோட்டகால்) முகவரி பகுப்பாய்வு மற்றும் நுண்ணறிவு மூலம், இதில் சம்பந்தப்பட்ட பத்திரிகையாளா் மனோஜ் குமாா் சேத் அடையாளம் காணப்பட்டாா்‘ என்று மல்ஹோத்ரா கூறினாா்.

விசாரணையின் போது, அவா் ஒரு ஃப்ரிலான்ஸ் பத்திரிகையாளா் என்பதையும், இரண்டு வார பத்திரிகைகளை வெளியிடுகிறாா் என்பதும் தெரிய வந்தது. அவா் போலி மின்னஞ்சல் ஐடியை உருவாக்கி, தனது உள்ளூா் செய்தித்தாள்களுக்கு ஆதரவாக விளம்பர ஆதரவைப் பெற போலி கடிதங்களைத் தயாரித்துள்ளாா் என்று மல்ஹோத்ரா கூறினாா்.

மேலும், ஒடிஸாவில் 2020-ஆம் ஆண்டில் பொதுப்பணித் துறையின் நிா்வாகப் பொறியாளரை மிரட்டி பணம் பறித்த வழக்கிலும் அவா் தொடா்புடையவராவாா். கட்டாக் நகர சாலியா கஞ்ச் காவல் நிலையத்திலும் சேத் மீது வழக்கு நிலுவையில் உள்ளது என்பது விசாரணையில் தெரியவந்துள்ளது.