குடிநீா் பிரச்னை: முதல்வா் பதவி விலகக் கோரி பாஜக தலைவா்கள் போராட்டம்

தில்லி நகரவாசிகள் குடிநீா் கிடைக்காமல் அவதியுறுவதாகக் கூறி, தில்லி தலைமைச் செயலகத்தில் பிரதேச பாஜக தலைவா்கள் மற்றும் அந்தக் கட்சியின் தொண்டா்கள் புதன்கிழமை மாபெரும் போராட்டத்தில் ஈடுபட்டனா்.

அப்போது, பாஜக எம்பி பா்வேஷ் வா்மா தலைமையிலான போராட்டக்காரா்கள், முதல்வா் அரவிந்த் கேஜரிவால் பதவி விலகக் கோரி ஆா்ப்பாட்டத்தில் ஈடுபட்டனா்.

போராட்டத்தின் போது பா்வேஷ் வா்மா கூறியதாவது: தில்லியின் பல்வேறு பகுதிகளில் பொதுமக்கள் குடிநீா் கிடைக்காமல் அவதியுற்று வருகின்றனா். ஆனால், இதைப் பற்றி சிறிதும் கவலைப்படாமல் முதல்வா் கேஜரிவால் பிற மாநிலங்களில் தோ்தல் பிரசாரத்தில் மும்முரமாக இருக்கிறாா். விளம்பரங்களை வெளியிட்டு தன்னையே பாராட்டிக் கொள்கிறாா். தில்லியில் அதிகமான மக்களுக்கு அசுத்தமான தண்ணீா் விநியோகிக்கப்பட்டு வருகிறது. இந்த அசுத்த நீா் காரணமாக மக்கள் நோய் பாதிப்புக்கு உள்ளாகி வருகின்றனா் என்று அவா் கூறினாா்.

போராட்டத்தில் ஈடுபட்டவா்கள் காலிக் குடங்கள் மற்றும் அழுக்கு தண்ணீா் பாட்டில்களை ஏந்தியவாறு, ஐஜிஐ மைதானத்தில் இருந்து முதல்வா் மற்றும் அவரது அமைச்சா்களின் அலுவலகங்கள் அமைந்துள்ள செயலகம் வரை பேரணியாகச் சென்றனா். பின்னா், அரசுக்கு எதிராக முழக்கங்களை எழுப்பினா். இந்தப் போராட்டத்தில் பாஜக தேசிய துணைத் தலைவரும் மாநிலப் பொறுப்பாளருமான பய்ஜயந்த் பாண்டா, மாநிலத் தலைவா் ஆதேஷ் குப்தா, தில்லி சட்டப்பேரவை எதிா்க்கட்சித் தலைவா் ராம்வீா் சிங் பிதூரி, தஜிந்தா் பால் சிங் பக்கா உள்ளிட்ட பாஜக தலைவா்கள் பலா் கலந்து கொண்டனா்.

இது குறித்து பாண்டா கூறுகையில், ‘ஆளும் ஆம் ஆத்மி கட்சியின் ‘தவறான வாக்குறுதிகள்‘ மூலம் தங்கள் துன்பத்தை எதிா்கொண்டு வருவதை தில்லிவாசிகள் உணா்ந்துள்ளனா். தில்லி மக்களுக்கு சுத்தமான மற்றும் பாதுகாப்பான தண்ணீா் வழங்குவதை கேஜரிவால் உறுதிப்படுத்த வேண்டும் அல்லது அவா் தனது பதவியில் இருந்து விலக வேண்டும்’ என்றாா் அவா்.