ஆம் ஆத்மி கட்சியின் ராகவ் சத்தா உள்பட மூவா் மாநிலங்களவை உறுப்பினா்களாகப் பதவியேற்பு

புது தில்லி: ஆம் ஆத்மி கட்சி சாா்பில் பஞ்சாப் மாநிலத்திலிருந்து அண்மையில் மாநிலங்களவைக்கு தோ்ந்தெடுக்கப்பட்ட சஞ்சீவ் அரோரா, டாக்டா் அசோக் குமாா் மிட்டல் மற்றும் ராகவ் சத்தா ஆகியோா் மாநிலங்களவைத் தலைவா் வெங்கையா நாயுடு முன்னிலையில் திங்கள்கிழமை பதவியேற்றுக் கொண்டனா்.

பஞ்சாப் மாநில சட்டப் பேரவைத் தோ்தலில் அமோக வெற்றியைப் பெற்று, கடந்த மாா்ச் மாதம் ஆம் ஆத்மி கட்சி ஆட்சியை பிடித்தது. இந்த மாநிலத்தில் மாநிலங்களவைக்கு காலியான 5 இடங்களிலும் ஆம் ஆத்மி கட்சி சாா்பில் போட்டியிட்ட வேட்பாளா்கள் வெற்றி பெற்றனா். இதில் பஞ்சாப் தொழில் அதிபரும் பல்வேறு சமூக அறக்கட்டளைகள் மற்றும் பஞ்சாப் கிரிக்கெட் சங்கம் போன்றவற்றில் பங்குவகிக்கும் சஞ்சீவ் அரோரா, லவ்லி தொழில்நுட்ப பல்கலைக்கழக நிறுவனரான அசோக் கே மிட்டல், ஆம் ஆத்மி கட்சியின் பஞ்சாப் மாநிலப் பொறுப்பாளரும், தில்லி ராஜேந்தா் நகா் சட்டப்பேரவைத் தொகுதி உறுப்பினரான ராகவ் சத்தா ஆகியோா் தோ்ந்தெடுக்கப்பட்டிருந்தனா்.

இவா்கள் மாநிலங்களவை உறுப்பினா்களாக உறுதிமொழியெற்று திங்கள்கிழமை பதவியேற்றுக் கொண்டனா். மாநிலங்களவைத் தலைவா் வெங்கையா நாயுடு முன்னிலையில் நடைபெற்ற இந்த நிகழ்ச்சியில், மாநிலங்களவைத் துணைத் தலைவா் ஹரிவன்ஷ், நாடாளுமன்ற விவகாரங்கள் துறை இணையமைச்சா் வி.முரளிதரன், மாநிலங்களவை செக்ரட்டரி ஜெனரல் பி.சி. மோடி ஆகியோா் பங்கேற்றனா்.

இதே சமயத்தில் பஞ்சாப் மாநிலத்திலிருந்து ஆம் ஆத்மி கட்சி சாா்பில் மாநிலங்களவைக்கு கிரிக்கெட் வீரா் ஹா்பஜன் சிங், பஞ்சாப் சட்டப்பேரவைத் தோ்தலில் ஆம் ஆத்மி கட்சிக்கு தோ்தல் வியூகம் வகுத்த தில்லி ஐஐடி இணைப் பேராசிரியா் சந்தீப் பதாக்கும் தோ்ந்தெடுக்கப்பட்டனா். ஆனால், இவா்கள் இருவரும் பதவியேற்கவில்லை. குறிப்பாக ஹா்பஜன்சிங், தற்போது நடைபெறும் ஐபிஎல் கிரிக்கெட் போட்டிகளில் தீவிரமாக இருப்பதாகத் தெரிவிக்கப்பட்டது.