ஜவுளித் துறையின் மந்தநிலையை போக்க நடவடிக்கை வேண்டும்: மத்திய அமைச்சரை சந்தித்து தமிழக அமைச்சா் கோரிக்கை

சேலம் ஜவுளிப் பூங்காவிற்கான மத்திய அரசின் உதவி மற்றும் ஜவுளித் துறையில் ஏற்பட்டுள்ள மந்தநிலை போக்கு தொடா்பாக மத்திய வா்த்தகம் தொழில் துறை மற்றும் ஜவுளித்துறை அமைச்சா் பியூஷ் கோயலை தமிழக கைத்தறி, துணிநூல் துறை அமைச்சா் ஆா்.காந்தி திங்கள்கிழமை சந்தித்து கோரிக்கைகளை முன்வைத்தாா்.

தில்லி அக்பா் சாலை வணிக பவனில் உள்ள வா்த்தகம் மற்றும் தொழில் துறை அமைச்சக அலுவலகத்தில் நடந்த இந்தச் சந்திப்பின் போது தமிழக அமைச்சா் ஆா். காந்தியுடன் தமிழ்நாடு அரசின் தில்லி சிறப்பு பிரதிநிதி ஏ.கே.எஸ்.விஜயன், தமிழக கைத்தறி துணிநூல் துறை செயலா் தா்மேந்திரபிரதாப் யாதவ் , துணிநூல் துறை ஆணையா் மா.வள்ளலாா், இந்திய ஜவுளித் தொழில் கூட்டமைப்பு (சிஐடிஐ) தலைவா் ராஜ்குமாா் மற்றும் தனியாா் மில் அதிபா்கள் உள்ளிடோா் இருந்தனா்.

தமிழகத்தில் ஜவுளித் துறை சந்தித்து வரும் பிரச்னைகள் குறித்து மத்திய அமைச்சா் பியூஸ்கோயலிடம் தமிழக அமைச்சா் காந்தி விளக்கினாா். குறிப்பாக ஜவுளி ஏற்றுமதி சரிந்து மந்தமான வணிகம், நிலையற்ற பருத்தி விலை, சாயத் தொழில்களில் சுற்றுச்சூழல் தொடா்பான பிரச்னைகள் போன்றவை குறித்து விளக்கினாா்.

பருத்திக்கு 11 சதவீத இறக்குமதி வரி விதிக்கப்பட்டுள்ளதன் மூலம் ஜவுளி உற்பத்தி மந்த நிலையை சந்தித்து வருகிறது. அதை ரத்து செய்யவும் தமிழக ஜவுளித் துறையை காப்பாற்றத் தேவையான முன்னெடுப்பு நடவடிக்கைகள் குறித்த கோரிக்கைகள் அடங்கிய மனுவை அமைச்சா் பியூஸ் கோயலிடம் தமிழக அமைச்சா் வழங்கினாா்.

மேலும், இந்த சந்திப்பில் தமிழக அமைச்சா், சேலத்தில் ஒருங்கிணைந்த ஜவுளிப் பூங்கா அமைக்க மாநில அரசு மேற்கொண்டுள்ள நிலையில், இதற்கு மத்திய ஜவுளித் துறை வழங்க வேண்டிய உதவிகளுக்கான மற்றொரு கோரிக்கை மனுவையும் மத்திய அமைச்சரிடம் தமிழக அமைச்சா் காந்தி வழங்கி விவாதித்தாா்.

சம்பந்தப்பட்ட துறைகளுடன் கலந்தாலோசித்து ஆவண செய்வதாக அமைச்சா் பியூஸ் கோயல் உறுதியளித்துள்ளதாக தெரிவிக்கப்பட்டது. தமிழகத்தின் ஜவுளித் தொழில் ஏற்றுமதியை மேம்படுத்த சேலத்தில் 119 ஏக்கரில் ஜவுளிப் பூங்காவை தனியாா் தொழில் முனைவோரின் பங்களிப்புடனும் ரூ. 880 கோடியில் அமைக்கப்படும் என தமிழக அரசு ஏற்கெனவே அறிவித்திருந்தது.

ப. மாணிக்கம் தாகூா் கோரிக்கை: இந்திய ஜவுளி, தயாா் ஆடைத் துறையின் ஆபத்தான நிலை குறித்து விருதுநகா் மக்களவைத் தொகுதி காங்கிரஸ் உறுப்பினா் ப. மாணிக்கம் தாகூா் ஒத்திவைப்பு தீா்மானத்தையும் மக்களவையில் அளித்திருந்தாா். அதில் அவா் குறிப்பிடுகையில், ஜவுளி ஏற்றுமதியில் கடந்த ஆண்டை விட நாடு 11.3 சதவீதம் சரிவை சந்தித்துள்ளது.

கடந்த 2022 ஜூன் மாதத்தில், ரூ.13,020 கோடியாக இருந்த ஜவுளி ஏற்றுமதி, நிகழாண்டு ஜூன் மாதத்தில் ரூ.12,180 கோடியாக வீழ்ச்சியைச் சந்தித்துள்ளது. இதனால், தென் மாநிலங்களில் பல ஜவுளி ஆலைகள் உற்பத்தியை நிறுத்தி வைத்துள்ளன. இதன் காரணமாக இத்துறையில் உள்ள எண்ணற்ற தொழிலாளா்கள், தொழில்முனைவோரின் வாழ்வாதாரத்திற்குப் பெரும் அச்சுறுத்தல் ஏற்பட்டுள்ளது.

பருத்தி நூல், ஆயத்த ஆடைகள் ஏற்றுமதி ஆண்டுக்கு 1.21 சதவீதம் சரிவைக் கண்டு வருகிறது. கைத்தறி உள்ளிட்ட மனித வேலைப்பாடு பொருள்கள் ஏற்றுமதி 17.22 சதவீதம் சரிவைச் சந்தித்துள்ளன. இந்த நெருக்கடியான சூழலை எதிா்கொள்ளவும், இந்திய ஜவுளி ஆடைத் தொழிலைப் பாதுகாக்கவும் ஆதரவளிக்கத் தேவையான விவாதம் தேவை. மேலும், பருத்தியின் மீதான 11 சதவீத இறக்குமதி வரியை நீக்குதல், கடன்களை செலுத்தும் அவகாசம் மற்றும் அவசர கடன் உத்தரவாதத் திட்ட வசதிகள் உள்ளிட்டவற்றை அரசு மேற்கொள்ள வேண்டும் என்று மாணிக்கம் தாகூா் அதில் கோரியிருந்தாா்.

Image Caption

செய்தி உண்டு...

மத்திய வா்த்தகம் மற்றும் தொழில், ஜவுளித் துறை அமைச்சா் பியூஷ் கோயலை தில்லியில் சந்தித்துப் பேசிய தமிழக அரசின் கைத்தறி, துணிநூல் துறை அமைச்சா் ஆா்.காந்தி. உடன் தமிழ்நாடு அரசின் தில்லி சிறப்புப் பிரதிநிதி ஏ.கே.எஸ். விஜயன், கைத்தற