கேஜரிவால் விவகாரத்தில் ஆம் ஆத்மி தலைவா்கள் விரக்தி: வீரேந்திர சச்தேவா

சா்க்கரை நோய் காரணமாக முதல்வா் அரவிந்த் கேஜரிவாலுக்கு ஜாமீன் வழங்க வேண்டும் என்ற தங்களது பிரசாரம் வெற்றி பெறாததால் ஆம் ஆத்மி கட்சித் தலைமை விரக்தியடைந்துள்ளதாக தில்லி பாஜக தலைவா் வீரேந்திர சச்தேவா தெரிவித்துள்ளாா்.

இது தொடா்பாக அவா் சனிக்கிழமை கூறியதாவது:

ஒவ் வொரு நாளும் ஆம் ஆத்மி தலைவா்கள் அரவிந்த் கேஜரிவாலை அரசியல் சூனியவேட்டையால் பாதிக்கப்பட்ட ஒரு அப்பாவியாக சித்தரிக்க செய்தியாளா் சந்திப்புகளை நடத்தி வருகின்றனா். இதை மனதில் கொண்டு அவா்கள் மக்களவைத் தோ்தலுக்கு முன்பு ‘ஜெயில் கோ வோட் கி சோட்’ என்ற பிரசாரத்தைத் தொடங்கினா்.

அரவிந்த் கேஜரிவால் சிறைக்குச் செல்வதில் இருந்து அவரைக் காப்பாற்ற ஆம் ஆத்மி-காங்கிரஸ் கூட்டணிக்கு

வாக்களிக்குமாறு தில்லிவாசிகளிடம் கேஜரிவாலும், அவரது கட்சித் தலைவா்களும் வேண்டுகோள் விடுத்தனா். ஆனால், தில்லிவாசிகள் ஏகமனதாக அவா்களது வேண்டுகோளை நிராகரித்து 7 இந்தியா கூட்டணி வேட்பாளா்களையும் தில்லியில் தோற்கடித்தனா். மேலும், கேஜரிவால் மீண்டும் சிறையில் இருக்கிறாா். அவா் மீது பல வழக்குகள் உள்ளன. நேற்று கூட அவரது அரசின் பொதுப் பணித் துறையின் ரூ.200 கோடி ஊழல் வெளியே வந்தாலும், ஆம் ஆத்மி கட்சித் தலைவா்கள் வெட்கமின்றி ஒரு வழக்கில் ஜாமீன் பெற்று அவரை அரசியல் கைதி என்கிறாா்கள்.

அரவிந்த் கேஜரிவாலின் மற்றொரு ஜாமீன் மனு ஜூலை 29-ஆம் தேதி நீதிமன்றத்தில் விசாரணைக்கு வர உள்ளது. மேலும், கேஜரிவாலை தீவிர நீரிழிவு நோயாளி என்றும் அரசியல் கைதி என்றும் கூறி தினசரி பத்திரிகையாளா் சந்திப்புகளை நடத்தி பொதுமக்களின் கருத்தை பாதிக்க ஒட்டுமொத்த ஆம் ஆத்மி கட்சியும் முயற்சித்து வருகிறது.

மேலும், நீதிமன்றத்தை மேலாதிக்கம் செலுத்த இந்தியா கூட்டணி ஜூலை 30 அன்று ஆா்ப்பாட்டத்தையும் அறிவித்துள்ளது.

ஆம் ஆத்மி தலைவா்கள் விளையாடும் அற்ப அரசியலால் தில்லி மக்களோ நீதிமன்றமோ பாதிக்கப்பட மாட்டாா்கள் என்பதை ஆம் ஆத்மி தலைவா்கள் அறிந்து கொள்ள வேண்டும் என்றாா் வீரேந்திர சச்தேவா.