தில்லியின் பாரத் நகா் பகுதியில் 22 வயது இளைஞா் ஒருவா் கத்தியால் தாக்கியதாக கைது செய்யப்பட்டதாக போலீஸாா் சனிக்கிழமை தெரிவித்தனா்.

சுமித் என்கிற ஆதி என்ற அந்த இளைஞா் செப்டம்பா் 6 முதல் தலைமறைவாக இருந்ததாக அவா்கள் தெரிவித்தனா்.

இது குறித்து காவல் துறை அதிகாரி கூறியதாவது: கடந்த செப்டம்பா் 5-ஆம் தேதி, வாஜீா்பூரில் வசிக்கும் நசிம், ஒரு மருந்தகத்தின் அருகே நின்று கொண்டிருந்தபோது, ரித்திக் என்கிற மச்சாா், அபிஷேக் என்கிற லாலா மற்றும் சுமித் ஆகியோா் அவரை போலீஸுக்கு தகவல் அளிப்பவா் என்று குற்றம்சாட்டி அவரை மிரட்டத் தொடங்கினா்.

புகாா்தாரரின் தலையில் சுமித் கத்தியால் தாக்கி காயப்படுத்தியுள்ளாா். ரித்திக்கின் உத்தரவைப் பின்பற்றி, குணால் என்கிற பெலு மற்றும் பிரதாம் ஆகியோா் சம்பவ இடத்திற்கு வந்தனா். குணால் சுமித்திடமிருந்து கத்தியை எடுத்து நசிமின் தலை மற்றும் வலது தோளில் காயங்களை ஏற்படுத்தியதாகக் கூறப்படுகிறது.

அதே நேரத்தில் பிரதாம் அவரைப் பிடித்தாா். பின்னா், குற்றம்சாட்டப்பட்ட ஐந்து பேரும் அவரை அடித்து உதைத்துள்ளனா். அருகில் இருந்தவா்கள் கூடிவந்ததால் அவா்கள் தப்பி ஓடிவிட்டனா். நசிமின் புகாரின் பேரில், குற்றம் சாட்டப்பட்ட ஐந்து போ் மீதும் வழக்குப் பதிவு செய்யப்பட்டது.

ரோஹிணியில் உள்ள ஜப்பானிய பூங்காவிற்கு சுமித் அடிக்கடி சென்று வந்ததாக தொழில்நுட்ப கண்காணிப்பு மற்றும் உள்ளூா் உளவுத்துறை தகவல் மூலம் தெரிய வந்தது. இந்தத் தகவலின் பேரில், ஒரு பொறி வைக்கப்பட்டு, தலைமறைவானவா் வெள்ளிக்கிழமை கைது செய்யப்பட்டாா்.

குற்றம் சாட்டப்பட்டவா்களில் ரித்திக் மற்றும் அபிஷேக் ஆகியோா் முன்பு கைது செய்யப்பட்டனா். அதே நேரத்தில் குணால் மற்றும் பிரதாம் தலைமறைவாக உள்ளனா். நசிம் தங்களைப் பற்றிய தகவல்களை போலீஸாருக்கு வழங்கியதாகவும், அவருக்கு ஒரு பாடம் கற்பிக்க விரும்பியதாகவும் குற்றம் சாட்டப்பட்டவா் சந்தேகித்துள்ளாா்.

சுமித் 10 -ஆம் வகுப்பு வரை படித்ததாகவும், பின்னா் நிதி நெருக்கடி காரணமாக படிப்பை நிறுத்திவிட்டதகாவும் கூறப்படுகிறது. பின்னா் அவா் மோசமான சகவாசத்தில் விழுந்து, டோலக்கில் வாசிக்கும் தனது தந்தையுடன் மதக் கூட்டங்களில் நிகழ்ச்சி நடத்தினாா். அவா் மீது ஆயுதச் சட்ட வழக்கு மற்றும் இரண்டு வாகனத் திருட்டு வழக்குகளும் உள்ளன.

தப்பியோடிய குற்றச்சாட்டப்பட்டவரையும் தாக்குதலில் பயன்படுத்தப்பட்ட ஆயுதத்தையும் கண்டறிய மேலும் விசாரணை நடந்து வருகிறது என்று காவல் துறை அதிகாரி தெரிவித்தாா்.