பைக் மோதி பெண் சாவு

புதுக்கடை அருகே இனயம் சின்னத்துறை பகுதியில், பைக் மோதியதில் பலத்த காயமடைந்த பெண் இறந்தார்.
இனயம் சின்னத்துறை பகுதியைச் சேர்ந்த வர்கீஸ் மனைவி பனியம்மை (55). இவர்,  புதன்கிழமை அப்பகுதியில் உள்ள கடைக்கு பால் வாங்க சென்றார். அப்போது  எதிரே குளச்சல் பகுதியைச் சேர்ந்த  பெலிக்ஸ் (18) ஓட்டி வந்த பைக் மோதியதில்,  அவருக்கு பலத்த காயம் ஏற்பட்டது. இதையடுத்து அப்பகுதியினர் அவரை மீட்டு குழித்துறை அரசு மருத்துவமனையில் அனுமதித்தனர். அவரை பரிசோதித்த மருத்துவர் ஏற்கெனவே அவர் இறந்துவிட்டதாக தெரிவித்தார். இதுகுறித்து புதுக்கடை போலீஸார் வழக்குப் பதிந்து விசாரித்து வருகின்றனர்.