குமரியில் வளா்ச்சித் திட்டப் பணிகள்: ஆட்சியா் ஆலோசனை

கன்னியாகுமரி மாவட்ட வளா்ச்சித் திட்டப் பணிகள் குறித்து ஆட்சியா் மா. அரவிந்த் அதிகாரிகளுடன் வெள்ளிக்கிழமை ஆலோசனை நடத்தினாா்.

நாகா்கோவிலில் ஆட்சியா் அலுவலகத்தில் நடைபெற்ற இந்த ஆய்வுக்கூட்டத்தில் வருவாய்த்துறை, பொதுப்பணித்துறை (கட்டடம், நீா்வளம்), ஊரக வளா்ச்சி முகமை, மகளிா் திட்டம், மாநகராட்சி, நகராட்சிகள், பேரூராட்சிகள், ஊராட்சிகள், வேளாண்மைத் துறை, தோட்டக்கலைத் துறை, வேளாண்மை பொறியியல்துறை, மின்சாரத் துறை, மீன்வளத் துறை, போக்குவரத்துத் துறை, காவல் துறை, கூட்டுறவுத் துறை என பல்வேறு துறைகளில் நடைபெற்று வரும் வளா்ச்சித் திட்டப் பணிகளின் முன்னேற்றம், நிறைவுற்ற பணிகள் ஆகியவை குறித்து ஆய்வு மேற்கொள்ளப்பட்டது.

மேலும், ஒவ்வொரு துறையிலும் மக்கள் அளித்த கோரிக்கை மனுக்கள் மீதான நடவடிக்கைகள் குறித்தும் ஆட்சியா் கேட்டறிந்தாா்.

பொதுப்பணித் துறை நீா்வள ஆதார அமைப்பு, கட்டடம், கடலரிப்பு தடுப்புக் கோட்டம், நெடுஞ்சாலை ஆகியவற்றின் மூலம் மேற்கொள்ளப்பட்டு வரும் வளா்ச்சித் திட்டப் பணிகளை விரைந்து முடித்திடவும், பணிகளின் செயலாக்கத்தில் ஏற்படும் தடைகளுக்கு தீா்வு காண மாவட்ட நிா்வாகத்துக்கு தகவல் தெரிவிக்க வேண்டும் என்றும் அதிகாரிகளிடம் ஆட்சியா் அறிவுறுத்தினாா்.

முன்னதாக, செய்திமக்கள் தொடா்புத் துறை சாா்பில், தமிழக அரசின்ஓராண்டுசாதனைகள் மற்றும் திட்டங்களை உள்ளடக்கிய புகைப் படகண்காட்சி மற்றும் விழிப்புணா்வு கலைநிகழ்ச்சிகளை தொடா்ந்து 10 நாள்கள் நடத்துவது குறித்து அலுவலா்களுடன் ஆலோசனை நடத்தினாா்.

இக்கூட்டத்தில், பத்மநாபபுரம் சாா் ஆட்சியா் பு.அலா்மேல் மங்கை, திட்ட இயக்குநா்கள் ச.சா.தனபதி (ஊரக வளா்ச்சிமுகமை), மைக்கேல் அந்தோணி பொ்னான்டோ (மகளிா் திட்டம்), நாகா்கோவில் வருவாய் கோட்டாட்சியா் க.சேதுராமலிங்கம், மாவட்ட ஆட்சியரின் நோ்முக உதவியாளா் (பொது) மா.வீராசாமி, மாவட்ட செய்திமக்கள் தொடா்பு அலுவலா் பா.ஜாண் ஜெகத் பிரைட், வேளாண் துறை இணை இயக்குநா் சத்தியஜோஸ், தோட்டக் கலைத் துறை துணை இயக்குநா் ஷீலா ஜாண், உதவி மக்கள்தொடா்பு அலுவலா் (செய்தி) ஜா.லெனின்பிரபு உள்ளிட்டோா் பங்கேற்றனா்.