பாளை.யில் கட்டடத் தொழிலாளி கொலை வழக்கு: 6 போ் கைது

பாளையங்கோட்டை திம்மராஜபுரத்தில் கட்டடத் தொழிலாளி வெட்டிக்கொலை செய்யப்பட்ட வழக்கில் 6 பேரை போலீஸாா் வியாழக்கிழமை கைது செய்தனா்.

பாளையங்கோட்டை திம்மராஜபுரம் முருகன் மகன்கள் இசக்கிமுத்து(25), சோ்மன்(39). இதில், இசக்கிமுத்து கட்டடத் தொழிலாளியாக வேலை செய்து வந்தாா். இவா்கள் இருவரும் புதன்கிழமை(ஆக.25) இரவு திம்மராஜபுரத்தில் உள்ள கோயில் அருகே நின்றுகொண்டிருந்தனராம். அப்போது அங்கு மோட்டாா் சைக்கிளில் வந்த 6 போ் இசக்கிமுத்து, சோ்மன் ஆகிய இருவரையும் அரிவாளால் வெட்டிவிட்டு தப்பிச் சென்றனராம். இதில் பலத்த காயமடைந்த இசக்கிமுத்து சம்பவ இடத்திலேயே உயிரிழந்தாா். இதில், சோ்மன் காயத்துடன் திருநெல்வேலி அரசு மருத்துவக்கல்லூரி மருத்துவமனையில் அனுமதிக்கப்பட்டாா்.

இது குறித்து தகவல் அறிந்து சம்பவ இடத்திற்கு சென்ற பாளையங்கோட்டை போலீஸாா் இசக்கிமுத்துவின் சடலத்தை மீட்டு திருநெல்வேலி அரசு மருத்துவக்கல்லூரி மருத்துவமனைக்கு பிரேதப் பரிசோதனைக்காக அனுப்பி வைத்தனா்.

இக் கொலை சம்பவம் தொடா்பாக மாநகர காவல் துணை ஆணையா்(சட்டம்-ஒழுங்கு) சுரேஷ்குமாா் மேற்பாா்வையில் காவல் உதவி ஆய்வாளா் காசிபாண்டி தலைமையில் தனிப்படை அமைக்கப்பட்டு குற்றவாளிகளை தேடும்பணி மேற்கொள்ளப்பட்டது.

இந்நிலையில், இக் கொலை தொடா்பாக திம்மராஜபுரம் முருகன் மகன் சுந்தரபாண்டியன் (29), சுரேஷ் மகன் ராம்குமாா் (22), குருசாமி மன் நம்பி நாராயணன் (20), ஆறுமுகம் மகன் முத்துக்குமாா் என்ற வாத்துகுமாா் (33), உச்சினிமாகாளி மகன் மாணிக்க ராஜ் (27), மேலப்பாட்டம் வேல் மகன் பழனி (30) ஆகிய 6 பேரையும் தனிப்படை போலீஸாா் வியாழக்கிழமை கைது செய்தனா்.

இவா்களிடம் போலீஸாா் மேற்கொண்ட முதற்கட்ட விசாரணையில் முன்விரோதம் காரணமாக இக்கொலை நிகழந்ததாகக் கூறப்படுகிறது. இது தொடா்பாக அவா்களிடம் போலீஸாா் மேலும் விசாரித்து வருகின்றனா்.