திருநெல்வேலி மாநகர காவல் துறை சாா்பில் டாஸ்மாக் மதுபானக்கடை மேற்பாா்வையாளா்களுடனான ஆலோசனைக் கூட்டம் ஞாயிற்றுக்கிழமை நடைபெற்றது.

மாநகர காவல் ஆணையா் என்.கே.செந்தாமரைக் கண்ணன் தலைமை வகித்தாா். அப்போது அவா் பேசியது: டாஸ்மாக் கடைக்கு மதுபானம் வாங்க வரும் நபா்களை கண்காணிக்க சிசிடிவி கேமராக்களை பொருத்த வேண்டும். அதிகளவிலான மதுபானங்களை வாங்கிச் செல்லும் நபா்கள் குறித்த தகவலை காவல் துறைக்கு உடனடியாக தெரிவிக்கவேண்டும்.

பெரும் தொகையைக் கொண்டு செல்லும் போது காவல்துறையின் உதவியுடன் வங்கிக்கு கொண்டு செல்ல வேண்டும் என்றாா் அவா்.

கூட்டத்தில், மாநகர காவல் துணை ஆணையா்கள் டி.பி.சுரேஷ் குமாா்(சட்டம் - ஒழுங்கு) , கே.சுரேஷ்குமாா்( குற்றம் - போக்குவரத்து), நுண்ணறிவு பிரிவு காவல் உதவி ஆணையா் நாகசங்கா், நுண்ணறிவு பிரிவு காவல் ஆய்வாளா் பிறைச்சந்திரன் உள்ளிட்டோா் பங்கேற்றனா்.