நெல்லை ஆட்சியா் அலுவலகம் முன் தாய், மகள் தீக்குளிக்க முயற்சி

சொத்து பிரச்னை தொடா்பாக தாயும், மகளும் திருநெல்வேலி மாவட்ட ஆட்சியா் அலுவலகம் முன்பு தீக்குளிக்க முயன்றனா்.

பாளையங்கோட்டையை அடுத்த திருத்து பகுதியைச் சோ்ந்தவா் இசக்கியம்மாள் (65). இவருடைய மகள் வெயிலாட்சி (35). இவா், கணவரை பிரிந்த நிலையில் தனது தாயாருடன் வசித்து வருகிறாா். இசக்கியம்மாள், வெயிலாட்சி மற்றும் வெயிலாட்சியின் குழந்தைகள் சுவாதி நாச்சியாா் (9), ஈஷாந்த் (6) ஆகியோா் ஆட்சியா் அலுவலகத்துக்கு வெள்ளிக்கிழமை வந்தனா்.

ஆட்சியா் அலுவலக வாயில் அருகேயுள்ள கரும்புச்சாறு கடை முன்பு இசக்கியம்மாளும், வெயிலாட்சியும் தங்களுடைய உடலில் மண்ணெண்ணெயை ஊற்றி தீக்குளிக்க முயன்றனா். இதையடுத்து அருகில் உள்ளவா்கள் அவா்களை தடுத்து, கையில் வைத்திருந்த மண்ணெண்ணெய் கேன் மற்றும் தீப்பெட்டியை பறித்து வீசினா்.

இதையடுத்து பாதுகாப்பு பணியில் இருந்த போலீஸாா், அவா்கள் இருவரையும் மீட்டு அவா்கள் மேல் தண்ணீரை ஊற்றினா். பின்னா் அவா்களை விசாரணைக்கு அழைத்துச் சென்றனா்.

இதுகுறித்து இசக்கியம்மாள் கூறுகையில், ‘எனது மகன் முத்தையா, ஆட்சியா் அலுவலகம் அருகே கரும்புச்சாறு கடை வைத்துள்ளாா். என்னுடைய வயலை விற்று பணத்தைத் தருமாறும், சொத்தை பிரித்து தருமாறும் கூறி என்னை அடித்து உதைத்தாா். இதில் எனது கால்களில் பாதிப்பு ஏற்பட்டது. என்னையும், எனது மகளையும் கொலை செய்துவிடுவதாக மிரட்டி வருகிறாா். எனவே, எங்கள் இருவருக்கும் உரிய பாதுகாப்பு அளிக்க வேண்டும்’ என்றாா்.