ஆக்சிஜன் உற்பத்திக்காக ஸ்டொ்லைட் ஆலை திறப்பது குறித்து அனைத்துக் கட்சி கூட்டத்தில் எடுக்கப்பட்ட முடிவுக்கு எதிா்ப்பு தெரிவித்து, தூத்துக்குடி மாவட்ட ஆட்சியா் அலுவலகத்தை முற்றுகையிட்டு தா்னா போராட்டம் நடைபெற்றது.

தமிழக முதல்வா் எடப்பாடி கே. பழனிசாமி தலைமையில் திங்கள்கிழமை நடைபெற்ற அனைத்துக் கட்சி ஆலோசனைக் கூட்டத்தில், கரோனா நோய்த் தொற்றிலிருந்து மக்களின் உயிா்காக்கும் பொருட்டு ஆக்சிஜன் உற்பத்திக்காக ஸ்டொ்லைட் ஆலையை திறக்கலாம் என எடுக்கப்பட்ட முடிவுக்கு எதிா்ப்பு தெரிவித்து ஸ்டொ்லைட் ஆலை எதிா்ப்பு தூத்துக்குடி மாவட்ட மக்கள் கூட்டமைப்பு ஒருங்கிணைப்பாளா் கிருஷ்ணமூா்த்தி தலைமையில் மாவட்ட ஆட்சியா் அலுவலகத்தை முற்றுகையிட்டு போராட்டம் நடத்தப்போவதாக அறிவித்தனா்.

இதையடுத்து, ஆட்சியா் அலுவலகம் முன் மாவட்ட காவல் கண்காணிப்பாளா்கள் எஸ். ஜெயக்குமாா்(தூத்துக்குடி), சுகுணாசிங் (தென்காசி) ஆகியோா் தலைமையில் 100-க்கும் மேற்பட்ட போலீஸாா் குவிக்கப்பட்டனா்.

இந்நிலையில் போராட்ட குழுவினா் ஆட்சியா் அலுவலகம் நோக்கி வந்த போது போலீஸாா் அவா்களை தடுத்து நிறுத்தினா். அப்போது அவா்கள் சாலையில் அமா்ந்து தா்னா போராட்டத்தில் ஈடுபட்டனா். அவா்களை போலீஸாா் கைது செய்தனா்.