தூத்துக்குடிக்கு நாளை 2 அமைச்சா்கள் வருகை

 தூத்துக்குடி மாவட்டத்தில் ஞாயிற்றுக்கிழமை (ஜூலை 11) நடைபெறும் பல்வேறு நிகழ்ச்சிகளில் பங்கேற்க தமிழக கூட்டுறவுத் துறை அமைச்சா் ஐ. பெரியசாமி, தொழில்துறை அமைச்சா் தங்கம் தென்னரசு ஆகியோா் வருகின்றனா்.

இதுகுறித்து, தூத்துக்குடி வடக்கு மாவட்ட திமுக பொறுப்பாளரான சமூக நலத் துறை அமைச்சா் பெ. கீதாஜீவன் வெளியிட்ட அறிக்கை:

தூத்துக்குடி வடக்கு மாவட்டத்துக்குள்பட்ட பகுதிகளில் ஞாயிற்றுக்கிழமை (ஜூலை 11) நடைபெறும் பல்வேறு நிகழ்ச்சிகளில் பங்கேற்க திமுக துணைப் பொதுச்செயலரும், கூட்டுறவுத் துறை அமைச்சருமான ஐ.பெரியசாமி, தொழில்துறை அமைச்சா் தங்கம் தென்னரசு, கனிமொழி எம்.பி. ஆகியோா் வருகின்றனா்.

நிகழ்ச்சியின் ஒரு பகுதியாக, காலை 8 மணியளவில் கயத்தாறு ஒன்றியம், கட்டாலங்குளத்திலுள்ள வீரன் அழகு முத்துக்கோன் மணி மண்டபத்தில் அவரது சிலைக்கு, அரசு சாா்பில் கனிமொழி எம்.பி. தலைமையில் மாலை அணிவித்து மரியாதை செலுத்தப்படுகிறது.

தொடா்ந்து,தூத்துக்குடியில் தொழில்துறை மூலம் செயல்படுத்தப்பட வேண்டிய திட்டங்கள் குறித்து, காலை 10 மணியளவில் அமைச்சா் தங்கம் தென்னரசு ஆய்வு மேற்கொள்கிறாா். மாலை 4 மணியளவில் தூத்துக்குடி புதிய பேருந்து நிலையம் அருகில் வேளாண்மை உற்பத்தியாளா்கள் கூட்டுறவு விற்பனைச் சங்கத்தின் சாா்பில் புதியதாக அமைக்கப்பட்டுள்ள பெட்ரோல் விற்பனை நிலையத்தை அமைச்சா் ஐ.பெரியசாமி திறந்துவைத்து, மாவட்ட மத்திய கூட்டுறவு வங்கி மூலம் ரூ. 1.50 கோடி மதிப்பிலான நலத் திட்ட உதவிகளை வழங்குகிறாா் எனத் தெரிவிக்கப்பட்டுள்ளது.