இலங்கை அகதிகளுக்கு குடியுரிமை பெற்றுத் தரமத்திய அரசை திமுக தொடா்ந்து வலியுறுத்தும்கனிமொழி எம்பி

இலங்கை அகதிகளுக்கு இந்திய குடியுரிமை பெற்றுத் தர மத்திய அரசை திமுக தொடா்ந்து வலியுறுத்தி வருகிறது என்றாா், தூத்துக்குடி மக்களவை உறுப்பினா் கனிமொழி.

தூத்துக்குடியில் அவா் செய்தியாளா்களிடம் வியாழக்கிழமை கூறியது: தென் மாவட்டங்களில் உள்ள இலங்கை அகதிகள் முகாம்களில் வசிப்போரின் பிரச்னைகளை முதல்வரிடம் எடுத்துக் கூறுவதற்காக முகாம் பொறுப்பாளா்கள் என்னை சந்தித்தனா். அவா்களின் கோரிக்கையை முதல்வரிடம் எடுத்துச் சொல்வேன்.

தூத்துக்குடி தாப்பாத்தி அகதிகள் முகாமில் இருப்போரின் கோரிக்கைகளை முதல்வரிடம் தெரிவித்துள்ளேன். அதைப் பரிசீலிப்பதாக உறுதி அளித்துள்ளாா். அடிப்படை வசதி, வாழ்வாதாரத்துக்கான கோரிக்கைகளை நிறைவேற்ற முகாம்களில் வசிப்போா் கேட்டுள்ளனா். அவா்களுக்கு குடியுரிமையை வழங்கவேண்டும் என திமுக தொடா்ந்து மத்திய அரசிடம் வலியுறுத்தி வருகிறது. அதைப் பெற்றுத்தரும் நடவடிக்கைகளில் ஈடுபடுவோம். சிலருக்கு சொந்த நாட்டுக்குத் திரும்பிச் செல்ல விருப்பமுள்ளது. அதுவும் பரிசீலிக்கப்பட வேண்டும்.

புதிய கடல் மீன்பிடி சட்டத் திருத்தத்தில் பலருக்கு மாற்றுக் கருத்துகள் உள்ளன. அனைத்து விஷயங்களிலும் மாநில உரிமைகளைத் தட்டிப் பறிப்பதை மத்திய அரசு செய்துவருகிறது. எனவே, அதை எதிா்க்கிறோம். மாநிலங்களுக்கான உரிமைகளை மத்திய அரசு தரவேண்டும். அதை விட்டுவிட்டு அனைத்து உரிமைகளையும் மத்திய அரசு எடுத்துக்கொண்டு தாங்களே முடிவெடுக்க நினைக்கக் கூடாது.

புதிய மீன்பிடி சட்டத் திருத்தத்தில் மிகக் கடுமையான தண்டனைகள் சொல்லப்பட்டுள்ளன. இந்த சட்டத் திருத்தம் மீனவா்களைப் பழிவாங்கும் நிலைக்குத்தான் கொண்டுசெல்லுமே தவிர அவா்களுக்கு தீா்வாக அமையாது என்றாா் அவா்.

முன்னதாக, தூத்துக்குடி, திருநெல்வேலி, தென்காசி, கன்னியாகுமரி, விருதுநகா் மாவட்டங்களில் உள்ள இலங்கை அகதிகள் முகாம்களின் பொறுப்பாளா்கள் பலா் கனிமொழியை சந்தித்து கோரிக்கைகள் குறித்து வலியுறுத்தினா்.