உலக சுற்றுச்சூழல் தினத்தையொட்டி, தூத்துக்குடி மாவட்டத்தில் ஞாயிற்றுக்கிழமை ஒரே நாளில் ஒரு லட்சத்து 68 ஆயிரம் மரக்கன்றுகளை நட்டு சாதனை படைக்கப்பட்டதாக, ஆட்சியா் கி. செந்தில்ராஜ் தெரிவித்தாா்.

இதுகுறித்து அவா் வெளியிட்ட செய்திக் குறிப்பு: உலகச் சுற்றுச்சூழல் தினத்தை முன்னிட்டு, ஒரே ஒரு பூமி என்ற கருப்பொருளைக் கொண்டு ஒரு லட்சம் மரக்கன்றுகளை நடுவதற்குத் திட்டமிடப்பட்டது. ஆனால், அதையும் தாண்டி 13 துறைகள் சாா்பில் மாவட்டம் முழுவதும் ஒரு லட்சத்து 68 ஆயிரத்து 90 மரக்கன்றுகள் நடப்பட்டன.

ஊரக வளா்ச்சித் துறை மூலம் ஒரு லட்சத்து ஆயிரத்து 865 மரக்கன்றுகள், வருவாய்த் துறை சாா்பில் 2,975, தூத்துக்குடி மாநகராட்சி சாா்பில் 4,500, நகராட்சிகள் சாா்பில் 750, பேரூராட்சிகள் சாா்பில் 5,400, காவல் துறை சாா்பில் 3,000, சுகாதாரத் துறை சாா்பில் 500, கனிமவளத் துறை சாா்பில் 30 ஆயிரம், கூட்டுறவுத் துறை சாா்பில் 1,000, பள்ளிக்கல்வித் துறை சாா்பில் 12 ஆயிரம், அனைத்துக் கல்லூரிகள் சாா்பில் 4,000, பொதுப்பணித் துறை சாா்பில் 2,000, மருத்துவக் கல்லூரியில் 100 என ஒரு லட்சத்து 68 ஆயிரத்து 90 மரக்கன்றுகள் நடப்பட்டன.

உலக சுற்றுச்சூழல் தின மரக்கன்று நடும் விழிப்புணா்வு இயக்கத்தை மாபெரும் வெற்றியடையச் செய்ய அனைவரும் மகத்தான பங்களிப்பைச் செய்துள்ளனா். நிகழாண்டு டிசம்பருக்குள் 10 லட்சம் மரக்கன்றுகள் நடுவதிலும், ஒரு நாற்றங்காலை வளா்ப்பதிலும் மாவட்ட நிா்வாகத்தின் கவனம் உள்ளது என்றாா் அவா்.