குடிநீரைச் சிக்கனமாகப் பயன்படுத்த தூத்துக்குடி மேயா் வேண்டுகோள்

தூத்துக்குடி மாநகரப் பகுதிக்கான குடிநீா் ஆதாரங்களில் இருந்து நீா்வரத்து குறைந்து வருவதால், பொதுமக்கள் குடிநீரைச் சிக்கனமாகப் பயன்படுத்துமாறு மேயா் ஜெகன் பெரியசாமி வேண்டுகோள் விடுத்துள்ளாா்.

தூத்துக்குடி மாநகராட்சி மாமன்றக் கூட்டம் வியாழக்கிழமை நடைபெற்றது. மேயா் ஜெகன் பெரியசாமி தலைமை வகித்தாா். மாநகராட்சி ஆணையா் தினேஷ் குமாா், துணை மேயா் ஜெனிட்டா ஆகியோா் முன்னிலை வகித்தனா். இக்கூட்டத்தில் மேயா் ஜெகன் பெரியசாமி பேசியதாவது:

தூத்துக்குடி மாவட்டத்தில் போதிய மழை பெய்யாத நிலையிலும், மாநராட்சிப் பகுதிகளில் சீரான குடிநீா் விநியோகம் செய்யப்பட்டு வருகிறது. மாநகரப் பகுதிக்கான குடிநீா் ஆதாரங்களில் இருந்து நீா்வரத்து குறைந்து வருவதால், பொதுமக்கள் குடிநீரைச் சிக்கனமாக பயன்படுத்த வேண்டும்.

பொலிவுறு நகரம் திட்டத்தில் கட்டப்பட்டுள்ள பேருந்து நிலையம் விரைவில் பொதுமக்கள் பயன்பாட்டிற்கு கொண்டுவரப்படும். மேலும், மாநகரப் பகுதிகளில் நடைபெறும் சாலை, கழிவுநீா் கால்வாய்கள் பணிகளை விரைந்து முடிக்க அறிவுறுத்தப்பட்டுள்ளது.

பனிமய மாதா பேராலய திருவிழாவையொட்டி மாநகாரட்சி சாா்பில் தேவையான அனைத்து அடிப்படை வசதிகளும் செய்யப்பட்டுள்ளன என்றாா்.

தீா்மானங்கள்: மாநகராட்சியின் 60 வாா்டுகளிலும் உள்ள தெருவிளக்குகள் அனைத்தும் எல்இடி விளக்குகளாக மாற்றப்பட்டு, அதன் பராமரிப்புக்கு 10 ஆண்டுகள் ஒப்பந்த காலம் மற்றும் ஆண்டுக் கட்டணம் நிா்ணயம் செய்வது, மாநகராட்சியில் உள்ள ஆரம்ப சுகாதார நிலையங்களில் நகர சுகாதார செவிலியா்கள் 4 போ் தொகுப்பூதிய அடிப்படையில் நியமனம் செய்வது என்பன உள்ளிட்ட 13 தீா்மானங்கள் நிறைவேற்றப்பட்டன.

மாமன்ற உறுப்பினா்கள், மாநகராட்சி அலுவலா்கள் உள்ளிட்டோா் பங்கேற்றனா்.