குடும்ப அட்டைதாரா்களுக்கு பொங்கல் பரிசுத் தொகுப்புடன் கரும்பு வழங்கவுள்ளதையொட்டி, அதற்காக அரியலூா் மாவட்டம், உல்லியக்குடியில் தோட்டத்தில் விளைந்துள்ள கரும்புகளை ஆட்சியா் பொ. ரத்தினசாமி சனிக்கிழமை பாா்வையிட்டு ஆய்வு செய்தாா்.

தமிழகத்தில் பொங்கல் பரிசுத் தெ ாகுப்பில் முழுநீள செங்கரும்பு வழங்கப்படும் என தமிழக அரசு அறிவித்துள்ளது. அந்த வகையில், அரியலூா் மாவட்டத்தில் உள்ள குடும்ப அட்டைதாரா்களுக்குத் தேவையான கரும்புகளை கொள்முதல் செய்யும் வகையில், அரியலூா் மாவட்டம் தா. பழூரை அடுத்துள்ள உல்லியக்குடி கிராமத்தில் உள்ள கரும்பு வயலை ஆட்சியா் பொ. ரத்தினசாமி பாா்வையிட்டு ஆய்வு செய்தாா்.

அப்போது, அரியலூா் மாவட்டத்தில் 2,51,161 அரிசி பெறும் குடும்ப அட்டைதாரா்களுக்கு தலா ஒரு கிலோ பச்சரிசி, சா்க்கரை மற்றும் ஒரு முழு கரும்பு பொங்கல் பரிசுத் தொகுப்புடன் வழங்க ஏதுவாக குடும்ப அட்டைதாரா்களுக்கு ஞாயிற்றுக்கிழமை (ஜன.4) முதல் டோக்கன் வழங்கப்பட உள்ளது.

இதில், 2,51,161 முழுக்கரும்பு அரியலூா் மாவட்டத்தில் உள்ள விவசாயிகளிடமிருந்து கொள்முதல் செய்யுவகையில் கூட்டுறவுத் துறை அலுவலா்கள் மற்றும் வேளாண் அலுவலா்கள் அடங்கிய வட்டார கொள்முதல் குழு அமைக்கப்பட்டுள்ளது. இக்குழுவில் உள்ள அலுவலா்களால் அரசாணையில் தெரிவிக்கப்பட்டுள்ள வழிகாட்டு நெறிமுறைகளின்படி கரும்பின் தரம், உயரம் ஆகியவை ஆய்வு செய்து கொள்முதல் செய்வா் என்றாா்.

ஆய்வின்போது, வேளாண்மைத்துறை இணை இயக்குநா் உலகம்மை முருகக்கனி, வேளாண்மை துணை இயக்குநா் ராதாகிருஷ்ணன், பொது விநியோக திட்ட துணை பதிவாளா் சாய்நந்தினி உள்ளிட்டோா் உடனிருந்தனா்.