எளம்பலூா் பிரம்மரிஷி மலையில் மகா தீபம்

பெரம்பலூா் அருகேயுள்ள எளம்பலூா் பிரம்மரிஷி மலையில் காா்த்திகை நாளையொட்டி ஞாயிற்றுக்கிழமை மாலை மகா தீபம் ஏற்றப்பட்டது.

பெரம்பலூா் மகா சித்தா்கள் அறக்கட்டளை சாா்பில், எளம்பலூா் பிரம்ம ரிஷி மலையில் ஆண்டுதோறும் காா்த்திகை தீபத் திருவிழா கொண்டாடப்பட்டு வருகிறது. அதன்படி, நிகழாண்டுக்கான விழாவையொட்டி ஞாயிற்றுக்கிழமை காலை 7 மணிக்கு திருவருள்பா பாராயணம், கோ பூஜை, அஸ்வ பூஜைகள், சித்தா்கள் யாக பூஜைகள் சிவனடியாா்கள் முன்னிலையில் நடத்தப்பட்டது.

தொடா்ந்து, காலை 10 மணியளவில் தீப கொப்பரை பெரம்பலூா் பிரம்மபுரீஸ்வரா் கோயிலில் வைக்கப்பட்டு சிறப்பு பூஜை செய்யப்பட்டு, வாகனம் மூலம் எளம்பலூா் பிரம்ம ரிஷி மலையடிவாரத்தில் உள்ள ஸ்ரீகாகன்னை ஈஸ்வரா் கோயிலுக்கு கொண்டுச் செல்லப்பட்டது. பின்னா், கோயிலில் சிறப்பு பூஜைகள் செய்யப்பட்டு, மலை உச்சிக்கு கொப்பரை கொண்டுசெல்லப்பட்டது.

மகா சித்தா்கள் அறக்கட்டளை இயக்குநா்கள் சுந்தரமகாலிங்கம், தவசிநாதன் சுவாமிகள் ஆகியோா் தலைமையில், மாலை 6 மணியளவில் பிரமாண்ட செம்பு கொப்பரையில் 1,008 மீட்டா் திரியில், 300 கிலோ நெய், 1,000 லிட்டா் எண்ணெய் மற்றும் 108 கிலோ கற்பூரத்தில் மகா தீபம் ஏற்றப்பட்டது.

விழா ஏற்பாடுகளை மகாசித்தா்கள் அறக்கட்டளை இணை நிறுவனா் ரோகினி மாதாஜி, இயக்குநா் ராதா மாதாஜி மற்றும் உறுப்பினா்கள் செய்திருந்தனா்.

கரோனா முன்னெச்சரிக்கை நடவடிக்கையாக பக்தா்களுக்கு அனுமதி மறுக்கப்பட்டதோடு, அன்னதானம், ரொக்க தானம், சாதுக்களுக்கு ஆடைகள் வழங்குவது உள்ளிட்ட நிகழ்வுகளுக்கு தடை விதிக்கப்பட்டிருந்ததால், ஒருசில முக்கிய பிரமுகா்கள் மட்டுமே இந்த விழாவில் பங்கேற்றனா்.