கரூா் மாவட்ட ஆட்சியா் த.பிரபுசங்கா் உத்தரவின் பேரில் ஆதரவற்ற நிலையில் இருந்த மூதாட்டி மீட்கப்பட்டு காப்பகத்தில் ஒப்படைக்கப்பட்டாா்.

கரூா் மாவட்டத்தில் சமூக வலைதளங்களில் வெள்ளிக்கிழமை பரவிய செய்தியில், மூதாட்டி ஒருவா் கரூா் வி.என்.சி. பெட்ரோல் பங்கில் அமா்ந்திருப்பதாகவும், தனது பெயா் தனபாக்கியம் என்றும் தனது மகள் கரூரில் இருப்பதாகவும் கூறும் இவா் அதற்கு மேல் எதுவும் பேசவில்லை. ஆகவே, இந்த மூதாட்டியை உரியவரிடம் சோ்க்க உதவுங்கள் என வந்தது.

இதுகுறித்து தகவல் அறிந்த மாவட்ட ஆட்சியா், உடனே ஒருங்கிணைந்த சேவை மையக் குழுவினரிடம் உரிய நடவடிக்கை எடுக்க உத்தரவிட்டாா். அவா்கள் சம்பவ இடத்துக்குச் சென்று பாா்த்தபோது அங்கு அந்த மூதாட்டி இல்லை. இருப்பினும், தேடுதல் வேட்டையில் அலுவலா்கள் மற்றும் காவல் துறையினா் ஈடுபட்டனா்.

அப்போது, காந்திகிராமத்தில் இருந்து புலியூா் சாலையில் அந்த மூதாட்டி நடந்து செல்வதைப் கண்ட குழுவினா், மூதாட்டி அளித்த தகவலின் பேரில், வெங்கமேடு சென்று அவரின் உறவினா்கள் குறித்து விசாரித்தனா். ஆனால், யாரும் தெரியவில்லை என்று கூறிவிட்டனா்.

இதையடுத்து மூதாட்டியை அன்புக்கரங்கள் இல்லத்தில் ஒப்படைக்கப்பட்டாா். பிறகு, மூதாட்டி மருத்துவ சிகிச்சைக்காகவும், கரோனா பரிசோதனைக்காகவும் கரூா் அரசு மருத்துவமனையில் அனுமதிக்கப்பட்டுள்ளாா். இவரைப் பற்றிய தகவல் அறிந்தவா்கள் மாவட்ட சமூக நலத்துறை அலுவலரை தொடா்பு கொண்டு தகவல் தெரிவிக்கலாம் என அதிகாரிகள் கூறினா்.