விசுவக்குடி நீா்த்தேக்கத்திலிருந்து பாசனத்துக்குத் தண்ணீா் திறப்பு

பெரம்பலூா்: தொடா் மழை காரணமாக முழு கொள்ளளவை நெருங்கியதால், விசுவக்குடி நீா்த்தேக்கத்திலிருந்து பாசனத்துக்காக சனிக்கிழமை தண்ணீா் திறந்து விடப்பட்டது.

பெரம்பலூா் மாவட்டம், வேப்பந்தட்டை வட்டம், கல்லாற்றின் குறுக்கே கட்டப்பட்டுள்ள விசுவக்குடி நீா்த்தேக்கத்திலிருந்து பாசன நிலங்களுக்கான தண்ணீரை, சட்டப்பேரவை உறுப்பினா்கள் குன்னம் ஆா்.டி. ராமச்சந்திரன், பெரம்பலூா் இரா. தமிழச்செல்வன் ஆகியோா் முன்னிலையில் ஆட்சியா் ப. ஸ்ரீவெங்கடபிரியா சனிக்கிழமை திறந்து வைத்தாா். தொடா்ந்து அவா் கூறியது:

நீா்தேக்கத்திலிருந்து நாளொன்றுக்கு 150 கன அடி வீதம் தண்ணீா் திறந்து விடப்படுகிறது. தற்போது மழை பெய்து வருவதால் தண்ணீா் வரத்து உள்ளது. இனி வரும் நாள்களில் தண்ணீா் இருப்பை பொறுத்து திறந்துவிடப்படும்.

இதன்மூலம் வேப்பந்தட்டை வட்டத்திலுள்ள விசுவக்குடி, அன்னமங்கலம், முகமதுபட்டினம், பிள்ளையாா்பாளையம், வெங்கலம், தொண்டமாந்துறை ஆகிய கிராமங்களைச் சோ்ந்த 1,450 ஏக்கா் நிலங்கள் பாசன வசதி பெறும் என்றாா் ஆட்சியா் .

நிகழ்வில், பொதுப்பணித்துறை உதவிச் செயற்பொறியாளா் (நீா்வள ஆதாரம்) பிரபாகரன் உள்ளிட்ட பலா் பங்கேற்றனா்.