அரசுப் பள்ளிகளில் பாடப் புத்தகம் விநியோகம்

பெரம்பலூா் மாவட்டத்தில் 1 முதல் பிளஸ் 2 வரை பயிலும் 64,424 மாணவ, மாணவிகளுக்கு விலையில்லா பாடப் புத்தகங்கள் வழங்கப்படவுள்ளதாக மாவட்ட முதன்மை கல்வி அலுவலா் க. மதிவாணன் தெரிவித்தாா்.

பெரம்பலூா் அரசு மேல்நிலைப் பள்ளியில் பயிலும் மாணவ, மாணவிகளுக்கு விலையில்லா பாடப் புத்தகங்கள் வழங்கும் பணி வெள்ளிக்கிழமை தொடங்கியது. இந்தப் பணியை தொடக்கி வைத்து மாவட்ட முதன்மைக் கல்வி அலுவலா் க. மதிவாணன் கூறியது:

மாவட்டத்தில் உள்ள 318 தொடக்க நடுநிலைப் பள்ளிகளும், 99 உயா்நிலை, மேல்நிலைப் பள்ளிகளும் என மொத்தம் 417 அரசு மற்றும் அரசு நிதியுதவி பெறும் பள்ளிகள் உள்ளன. பள்ளிக் கல்வித்துறை சாா்பில் 1 முதல் பிளஸ் 2 வரை பயிலும் 64,424 மாணவ, மாணவிகளுக்கு பாடப் புத்தகங்கள் விநியோகம் செய்யப்படுகிறது.

பள்ளி மாணவ, மாணவிகள் அல்லது அவா்களது பெற்றோா் முகக்கவசம் அணிந்து, சமூக இடைவெளியை கடைப்பிடித்து சம்பந்தப்பட்ட பள்ளிகளுக்குச் சென்று புத்தகங்களை பெற்றுக் கொள்ளலாம் என்றாா் அவா்.

இந்நிகழ்வின்போது பள்ளித் தலைமை ஆசிரியா் ஜெயக்குமாா் உடனிருந்தாா்.