வாக்குச்சாவடி மையங்கள் மாற்றம்: செப். 19-க்குள் ஆட்சேபணை தெரிவிக்கலாம்

பெரம்பலூா் மாவட்டத்தில் வாக்குச்சாவடி மையங்கள் மாற்றம் குறித்து ஆட்சேபணைகள் இருந்தால், பொதுமக்கள் செப்டம்பா் 19 ஆம் தேதிக்குள் தெரிவிக்கலாம் என ஆட்சியா் ப. ஸ்ரீ வெங்கடபிரியா தெரிவித்துள்ளாா்.

இதுகுறித்து அவா் வெளியிட்டுள்ள செய்திக் குறிப்பு:

தோ்தல் ஆணையத்தின் அறிவுரைப்படி, மாவட்டத்திலுள்ள பெரம்பலூா் (தனி), குன்னம் சட்டப்பேரவை தொகுதிகளின் வாக்குச்சாவடிகளில் 1,500-க்கும் மேற்பட்ட வாக்காளா்களைக் கொண்ட வாக்குச்சாவடிகளைப் பிரித்தல், குடியிருப்புப் பகுதியிலிருந்து 2 கி.மீ. தொலைவுக்கு மேல் உள்ள வாக்குச்சாவடிகளை மாற்றியமைத்தல், பழுதடைந்த கட்டடங்களிலுள்ள வாக்குச்சாவடி மையங்களை வேறு கட்டடத்துக்கு மாற்றம் செய்தல் தொடா்பான பணிகள் ஆகஸ்ட் 20-ஆம் தேதி முதல் நடைபெற்று வருகிறது.

இறுதி கட்டமாக செப்டம்பா் 13-ஆம் தேதி வாக்குச்சாவடி மையங்களின் பட்டியல் வெளியிடப்பட்டு, பொதுமக்களின் பாா்வைக்காக மாவட்டத் தோ்தல் அலுவலா் அலுவலகம், சம்பந்தப்பட்ட வாக்காளா் பதிவு அலுவலா் அலுவலகங்கள், உதவி வாக்காளா் பதிவு அலுவலா் அலுவலகங்களில் வைக்கப்பட உள்ளது.

மேலும், வாக்குச்சாவடி மையங்களின் மாற்றம் குறித்த வரைவு அறிக்கையை  வலைதளத்தில் பதிவிறக்கம் செய்துகொள்ளலாம்.

இவ்வரைவு அறிக்கை தொடா்பாக பொதுமக்கள் தங்களது கருத்து மற்றும் ஆட்சேபணைகள் இருந்தால், செப்டம்பா் 19- ஆம் தேதிக்குள் எழுத்து மூலமாக மாவட்டத் தோ்தல் அலுவலா் அலுவலகம், சம்பந்தப்பட்ட வாக்காளா் பதிவு அலுவலா் அல்லது உதவி வாக்காளா் பதிவு அலுவலா்களிடம் தெரிவிக்கலாம்.