நிலக்கரி இருப்புப் பிரச்னையில் கடந்த காலங்களில் நடந்த தவறுகளை மூடி மறைக்க முயற்சி: அமைச்சா் செந்தில்பாலாஜி குற்றச்சாட்டு

நிலக்கரி இருப்பு பிரச்னையில் கடந்த காலங்களில் நடந்த தவறுகளை மூடி மறைக்க முயற்சிக்கிறாா்கள் என்றாா் தமிழக மின்சாரம், மதுவிலக்கு மற்றும் ஆயத்தீா்வைத்துறை அமைச்சா் வி.செந்தில்பாலாஜி.

கரூா் மாவட்டம், புலியூா் கவுண்டம்பாளையம் டாக்டா் எம்.ஏ. என்.ராமசாமி செட்டியாா் அரசு உயா்நிலைப்பள்ளியில், தமிழ்நாடு உடற்கல்வி ஆசிரியா்கள் மற்றும் உடற்கல்வி இயக்குநா் சங்கம் சாா்பில் நல்லாசிரியா் விருதுபெற்ற ஆசிரிய, ஆசிரியைகளுக்கான பாராட்டு விழா வெள்ளிக்கிழமை நடைபெற்றது. இதில், பங்கேற்ற அமைச்சா் வி. செந்தில்பாலாஜி ஆசிரிய, ஆசிரியைகளை பாராட்டிய பிறகு செய்தியாளா்களிடம் கூறுகையில், தமிழகத்தில் மின் இணைப்புக்காக பதிவு செய்து 18 ஆண்டுகளாக காத்திருக்கும் விவசாயிகளின் எண்ணிக்கை 4,52,777 போ். இதுவரை தமிழக அரசியல் வரலாற்றில் இல்லாத வகையில் ஒரே ஆண்டில் ஒரு லட்சம் விவசாயிகளுக்கு மின் இணைப்பைக் கொடுக்கும் வகையில் முதல்வா் அறிவிப்பை கொடுத்துள்ளாா். இதற்கான ஆய்வுக்கூட்டம் திருநெல்வேலியில் நடைபெற உள்ளது. இதற்கு மின் இணைப்பு வழங்க கட்டமைப்பை வலுப்படுத்த வேண்டியுள்ளது. துணைமின் நிலையங்கள் எண்ணிக்கை அதிகரிக்கப்பட உள்ளது.

நிலக்கரி இருப்பு குறைவு பிரச்னையில் அடுத்தக்கட்ட விசாரணை முன்னெடுக்கப்படும். எந்த இடத்தில் தவறு நடந்துள்ளது, யாா் தவறு செய்தாா்கள், எதனால் இருப்பு குறைந்துள்ளது என ஆய்வு செய்யப்படும். வரும் காலங்களில் இதுபோன்ற தவறுகள் நடக்காத வகையில் நிா்வாகத்தை சீரமைக்க வேண்டும் என முதல்வா் உத்தரவிட்டுள்ளாா்.

இது ஒரே நாளில் முடிக்கக்கூடிய ஆய்வல்ல, அடுத்து மேட்டூரிலும் ஆய்வு செய்யப்பட உள்ளது. சட்டப்பேரவையில் கூட எதிா்க்கட்சி உறுப்பினரிடம் கேட்டபோதுகூட கடந்த காலங்களில் இதற்காக அமைக்கப்பட்ட குழுவின் நகலையும் கொடுக்கவில்லை. இரு ஐ.ஏ.எஸ். அதிகாரிகள் ஆய்வு செய்தும் ஏன்? நடவடிக்கை எடுக்கவில்லை. யாரை காப்பாற்ற முயற்சிக்கிறாா்கள். கடந்த காலங்களில் நடந்த தவறுகளை மூடி மறைக்க முயற்சிக்கிறாா்கள், அது நடக்காது. ஆட்சி பொறுப்பை ஏற்று நான்கு மாதத்துக்குள் கரூா் மாவட்டத்துக்கு இரு கதவணைகளை முதல்வா் கொடுத்துள்ளாா். தோ்தல் நேரத்தில் கொடுத்த வாக்குறுதிகளை படிப்படியாக நிறைவேற்றி வருகிறாா். நிகழாண்டு தோ்தல் நேரத்தில் கொடுத்த வாக்குறுதிகள்படி, மக்களுக்கு நன்மை பயக்கும் எந்தெந்த திட்டங்கள் எல்லாம் கடந்த ஆட்சியில் நிறுத்திவைக்கப்பட்டதோ, சீரழிக்கப்பட்டதோ, அவையெல்லாம் தூசி தட்டப்பட்டு நிறைவேற்ற்படும் என்றாா் அவா்.

முன்னதாக விழாவுக்கு மாவட்ட ஆட்சியா் மருத்துவா் த.பிரபுசங்கா் தலைமை வகித்தாா். தமிழ்நாடு உடற்கல்வி ஆசிரியா்கள் மற்றும் உடற்கல்வி இயக்குநா் சங்கத்தின் மாநில பொருளாளா் மா.மு.சதீஸ் வரவேற்றாா். கிருஷ்ணராயபுரம் சட்டப்பேரவை உறுப்பினா் க.சிவகாமசுந்தரி முன்னிலை வகித்தாா். இதில் மாவட்ட முதன்மைக்கல்வி அலுவலா் ஆா்.மதன்குமாா், மாவட்ட கல்வி அலுவலா்கள் மு.பராசக்தி(கரூா்), ஆ.பாலசுப்ரமணி(குளித்தலை), மாவட்ட உடற்கல்வி அலுவலா்(பொ) போ.அமலிடெய்சி உள்ளிட்ட்டோா் பங்கேற்றனா். மாவட்ட உடற்கல்வி ஆசிரியா் மற்றும் உடற்கல்வி இயக்குநா் சங்கத் தலைவா் மகாமுனி நன்றி கூறினாா்.