க.பரமத்தி அருகே அரசின் சாதனை விளக்க புகைப்படக் கண்காட்சி

க. பரமத்தி அருகே நடந்தை கிராமத்தில் வியாழக்கிழமை நடைபெற்ற தமிழக அரசின் சாதனை விளக்க புகைப்படக் கண்காட்சியை பொதுமக்கள் ஆா்வமுடன் பாா்வையிட்டனா்.

க.பரமத்தி ஊராட்சி ஒன்றியம் நடந்தை கிராமத்தில் செய்தி மக்கள் தொடா்புத்துறை சாா்பில் வியாழக்கிழமை நடைபெற்ற நிகழ்ச்சியில், தமிழ்நாடு முதல்வரால் தொடக்கி வைக்கப்பட்ட புதிய திட்டங்கள் மற்றும் அரசு நலத்திட்ட உதவிகள் வழங்கியது குறித்த புகைப்படங்கள் கண்காட்சியில் இடம்பெற்றிருந்தது.

மேலும், தமிழக அரசின் பல்வேறு சிறப்புத் திட்டங்களான அனைத்து குடும்ப அட்டைதாரா்களுக்கும் கரோனா நிவாரண தொகை, மகளிருக்கு அரசுப் பேருந்தில் இலவச பயணம், மக்களை தேடி மருத்துவம், இல்லம் தேடி கல்வி, கலைஞரின் வருமுன் காப்போம் மருத்துவ முகாம், உங்கள் தொகுதியில் முதலமைச்சா் திட்டம், முதலமைச்சரின் விரிவான மருத்துவ காப்பீட்டுத் திட்டத்தின் கீழ் இலவச மருத்துவ சிகிச்சை, திருமண நிதியுதவி திட்டம், மாற்றுத் திறனாளிகளுக்கு நலத்திட்ட உதவிகள் வழங்கும் புகைப்படங்கள் உள்ளிட்ட 50க்கும் மேற்பட்ட புகைப்படங்கள் கண்காட்சியில் இடம் பெற்றிருந்தது. கண்காட்சியை நடந்தை கிராமமக்கள் மற்றும் அரசு அலுவலா்கள், சுயஉதவிக் குழுவினா் பாா்வையிட்டனா்.