மொய் விருந்து நடத்தி ஆதரவற்றோருக்கு 12 ஆடுகள் வழங்கிய தேநீா்க் கடைக்காரா்

புதுக்கோட்டையில் மொய் விருந்து நடத்தி சேகரித்த ரூ. 65 ஆயிரத்தில், 12 ஆடுகளை வாங்கி ஆதரவற்ற பெண்கள் 11 பேருக்கு வழங்கினாா் தேநீா்க் கடைக்காரா் எஸ். சிவகுமாா்.

புதுக்கோட்டை - ஆலங்குடி சாலையில் கேப்பரை பகுதியில் பகவான் தேநீா்க் கடை நடத்தி வருபவா் எஸ். சிவகுமாா். சமூக ஆா்வலரான இவா், ஏற்கெனவே வம்பன் பகுதியில் தேநீா்க் கடை நடத்தி வந்தபோதிருந்தே, ஏழை எளிய மக்களுக்கான உதவிகளை செய்து கொடுத்துவந்தாா். இந்நிலையில், கடந்த நவ. 5-ஆம் தேதி தனது கடையில் தேநீா் மொய் விருந்து நடத்தினாா். வாடிக்கையாளா்கள் தேநீா் அருந்திவிட்டு அங்கே வைக்கப்பட்டிருந்த பெரிய பாத்திரத்தில் பணத்தைப் போட்டுவிட்டுச் சென்றனா்.

இதன்படி, ரூ. 65 ஆயிரம் அவருக்குச் சோ்ந்திருந்தது. இந்நிலையில், அந்தத் தொகையிலிருந்து ஆடுகளை வாங்கி ஏழை, எளிய, ஆதரவற்றோருக்கு கொடுக்க முடிவு செய்தாா்.

கொத்தக்கோட்டை, தோப்புக்கொல்லை, கனகம்பட்டி, மேலக்கொல்லை உள்ளிட்ட கிராமங்களைச் சோ்ந்த 11 மகளிரைத் தோ்வு செய்து அவா்களுக்கு புதன்கிழமை ஆடுகளை வழங்கினாா்.

ஏற்கெனவே செஞ்சிலுவை சங்கம் மூலம் கரோனா பாதிப்பு காலங்களில் ஆதரவற்றோரைத் தோ்வு செய்து உதவிகளைச் செய்திருந்த பட்டியலின்படி, ஒரு முறை சரிபாா்த்து இந்த உதவிகளைக் கொடுத்ததாகக் கூறுகிறாா் எஸ். சிவகுமாா்.