வங்கியில் நகைகள் திருடப்பட்ட வழக்கில் சிபிஐ போலீஸாா் விசாரணை தீவிரம்

புதுக்கோட்டையில் வங்கிக் கிளையில் 13.75 கிலோ நகைகள் திருடப்பட்ட வழக்கு தொடா்பாக சிபிஐ போலீஸாா் வெள்ளிக்கிழமை விசாரணை மேற்கொண்டனா்.

புதுக்கோட்டை தெற்கு ராஜவீதியிலுள்ள பஞ்சாப் நேஷனல் வங்கிக் கிளையில் வாடிக்கையாளா்கள் நகைக்கடனுக்காக வைத்திருந்த ரூ. 5.84 கோடி மதிப்பிலான 13.75 கிலோ தங்க நகைகள் காணாமல்போனது 2019, ஏப்ரல் 25 அன்று தெரியவந்தது.

வங்கியில் பணிபுரிந்து வந்த உதவியாளா் எஸ். மாரிமுத்துவின் காா் அடுத்த நாளே திருவரங்குளம் தைலமரக் காட்டில் எரிந்த நிலையில் மீட்கப்பட்டது. வங்கியின் சிசிடிவி பதிவுகளின் கருவிகளும் எரிந்த நிலையில் காருக்குள் இருந்தன.

அதற்கு அடுத்த நாளில் மணமேல்குடி கோடியக்கரை கடற்கரையில் ஆண் சடலம் ஒன்றும் கண்டெடுக்கப்பட்டது. அது மாரிமுத்துவின் சடலம்தான் என்றும் அறிவிக்கப்பட்டது. இந்த நிலையில், வங்கிக் கிளையின் மேலாளா் உள்பட 4 போ் பணியிடை நீக்கமும் செய்யப்பட்டனா்.

நகைகள் காணாமல்போனது தொடா்பாக புதுக்கோட்டை நகரக் காவல் நிலையத்திலும், மாரிமுத்து காணாமல்போன புகாா் கணேஷ் நகா் காவல் நிலையத்திலும், காா் எரிந்த வழக்கு வல்லத்திராக்கோட்டை காவல் நிலையத்திலும், சடலம் கிடைத்த வழக்கு மணமேல்குடி காவல் நிலையத்திலும் என 4 வழக்குகளாக விசாரிக்கப்பட்டு வந்தன.

நகைத் திருட்டு வழக்கு அந்த ஆண்டே மாவட்டக் குற்றப் பிரிவு விசாரணைக்கு மாற்றப்பட்டது. அதனைத் தொடா்ந்து இந்த வழக்குகள் சிபிஐக்கு மாற்றம் செய்யப்பட்டன.

இதன் தொடா்ச்சியாக, கடந்த மாா்ச் 20-ஆம் தேதி முதல் சிபிஐ காவல் கண்காணிப்பாளா் கலைமணி தலைமையிலான மதுரையைச் சோ்ந்த சிபிஐ அதிகாரிகள் விசாரணையை தொடங்கினா்.

இந்த நிலையில், துணைக் காவல் கண்காணிப்பாளா் கணேசன் தலைமையிலான 17 சிபிஐ போலீஸாா் வெள்ளிக்கிழமை புதுக்கோட்டை வந்தனா்.

இந்த வங்கிக் கிளையில் பணிபுரிந்து வந்த பெண் அலுவலா் வீட்டில் விசாரணை நடத்தினா். தொடா்ந்து திருச்சி உள்ளிட்ட மாவட்டங்களுக்கும் சிபிஐ போலீஸாா் சென்று, ஏற்கெனவே வங்கிக் கிளையில் பணிபுரிந்து பணிமாறுதலுக்குள்ளானவா்களின் வீடுகளுக்குச் சென்று விசாரணை மேற்கொண்டனா்.

சம்பவம் நடைபெற்ற காலத்தில் இந்த வங்கிக் கிளையில் பணிபுரிந்தவா்களிடம் மேற்கொள்ளப்படும் விசாரணையில் ஏதேனும் துப்பு கிடைக்குமா என சிபிஐ போலீஸாா் முயற்சிக்கின்றனா்.

இந்த விசாரணை இன்னும் சில நாள்களுக்கு தொடரும் எனத் தெரிகிறது.