தூத்துக்குடி துப்பாக்கிச் சூடு சம்பவத்தைக் கண்டித்து தஞ்சாவூர் ரயிலடியில் ஜாக்டோ - ஜியோ அமைப்பினர் வியாழக்கிழமை மாலை ஆர்ப்பாட்டம் நடத்தினர்.
தூத்துக்குடி ஸ்டெர்லைட் ஆலைக்கு எதிராகப் போராட்டத்தில் ஈடுபட்டு இறந்தவர்கள், காயமடைந்தவர்கள், பாதிக்கப்பட்ட அனைவருக்கும், சொத்துகளை இழந்தவர்களுக்கும் உரிய நிவாரணைத்தைத் தமிழக அரசு வழங்க வேண்டும். துப்பாக்கிச் சூட்டின்போது விதிமுறைகளைக் கடைப்பிடிக்காமல் 12 பேரின் படுகொலைக்குக் காரணமான காவல் துறை அலுவலர்களைப் பணி நீக்கம் செய்ய வேண்டும். ஸ்டெர்லைட் ஆலையை உடனடியாக மூட வேண்டும். உரிய நீதி விசாரணை நடத்த வேண்டும். இறந்தவர்களின் குடும்பத்துக்கு அரசு வேலை வழங்க வேண்டும் ஆகிய கோரிக்கைகளை வலியுறுத்தி முழக்கங்கள் எழுப்பப்பட்டன.
தமிழ்நாடு அரசு ஊழியர் சங்க மாநில செயலாளர் ஆர். பன்னீர்செல்வம் தலைமை வகித்தார். தமிழ்நாடு முதுநிலை பட்டதாரி ஆசிரியர் சங்க மாநில துணைத் தலைவர் எம். ஆனந்த், தமிழ்நாடு மேல்நிலைப் பள்ளி தலைமை ஆசிரியர் கழக மாநிலச் செயலர் எம். ரவிச்சந்திரன், தமிழ்நாடு அரசு ஊழியர் சங்க மாவட்டத் தலைவர் எஸ். கோவிந்தராசு உள்ளிட்டோர் கலந்து கொண்டனர்.