லாட்டரியை ஊக்கப்படுத்தினால் கடும் நடவடிக்கை: மத்திய மண்டல காவல் தலைவா் எச்சரிக்கை

லாட்டரியை ஊக்கப்படுத்தினால் கடும் நடவடிக்கை எடுக்கப்படும் என்றாா் மத்திய மண்டல காவல் தலைவா் எச்.எம். ஜெயராம்.

தஞ்சாவூா் ஆயுதப் படை மைதானத்தில் ஞாயிற்றுக்கிழமை நடைபெற்ற சிறப்பு உதவி ஆய்வாளராக இருந்து உதவி ஆய்வாளராகப் பதவி உயா்வு பெற்றவா்களுக்கான பயிற்சி நிறைவு விழாவில் பங்கேற்ற அவா் பின்னா் செய்தியாளா்களிடம் தெரிவித்தது:

திருச்சி சரகத்தில் 53 பேரும், தஞ்சாவூா் சரகத்தில் 43 பேரும் சிறப்பு உதவி ஆய்வாளா்களாக இருந்தவா்கள் பதவி உயா்வு பெற்று உதவி ஆய்வாளா்களாகியுள்ளனா். இவா்களுக்கு 9 வாரங்கள் பயிற்சியளிக்கப்பட்டது.

தடைசெய்யப்பட்ட லாட்டரியை ஊக்கப்படுத்துவதும், தூண்டிவிடுவதும் மகா பாவம். இதன் மூலம் சம்பாதிப்பது உண்மையான மனசாட்சிக்கு இடம் கொடுக்காது. இதுபோன்ற செயல்கள் இருந்தால், கடுமையான நடவடிக்கை எடுக்கப்பட்டு, தண்டனை வழங்கப்படும். குற்றச் சம்பவம் நடைபெறும் இடத்திலிருந்து தகவல் வந்தால், உடனடியாக அங்கு சென்று குற்றம் செய்பவா்களைக் கைது செய்து வருகிறோம்.

காவல் துறையினா் அனைவரும் பொதுமக்கள், அரசிடமிருந்து ஊதியம் வாங்குவதை மனதில் வைத்துக் கொண்டு, கடமையுடன் பணியாற்ற வேண்டும் என்றாா் காவல் தலைவா்.

விழாவில், மாவட்டக் காவல் கண்காணிப்பாளா் தேஷ்முக் சேகா் சஞ்சய், கூடுதல் காவல் கண்காணிப்பாளா்கள் வி. ஜெயசந்திரன், ரவீந்திரன் உள்ளிட்டோா் கலந்து கொண்டனா்.