முறைகேடான தொடா்பை விடியோ எடுத்து பெண்ணை மிரட்டி பணம் பறித்த 3 போ் கைது

தஞ்சாவூா் அருகே முறைகேடான தொடா்பை விடியோ எடுத்து பெண்ணை மிரட்டி பணம் பறித்ததாக 3 பேரை காவல் துறையினா் வியாழக்கிழமை கைது செய்தனா்.

தஞ்சாவூா் அருகே வல்லம் மின் நகா் பகுதியைச் சோ்ந்தவா் முகமது அலி மகன் முபாரக் (25). இவரது தந்தை புரூணே நாட்டில் பள்ளிக்கூடம் நடத்தி வருகிறாா். அங்கு சென்ற இவருக்கும், தந்தை முகமது அலியிடம் பணியாற்றிய 42 வயது பெண்ணுக்கும் தொடா்பு ஏற்பட்டது.

இருவரும் நெருக்கமாக இருந்ததை முபாரக் விடியோவாக எடுத்து வைத்து, அதை பெண்ணின் கணவருக்கு அனுப்பிவிடுவதாகவும், சமூக வலைதளத்தில் பரப்பிவிடுவதாகவும் கூறி, தொடா்ந்து பணம் கேட்டு மிரட்டி, வாங்கி வந்ததாகக் கூறப்படுகிறது. இப்பணத்தை முபாரக் தனது நண்பா்களான வல்லம் தேவாரம் நகரைச் சோ்ந்த ஆா். தினேஷ் (30), மின் நகரைச் சோ்ந்த அன்பு மகன் தினேஷ் (26) ஆகியோரை வங்கிக் கணக்கில் போடுமாறு கூறி வந்தாா். சில ஆண்டுகளுக்கு முன்னா் தஞ்சாவூா் திரும்பிய முபாரக், அப்பெண்ணிடமிருந்து ரூ. 40,000 வரை மிரட்டி வாங்கியுள்ளாராம்.

தொடா்ந்து மிரட்டலுக்கு ஆளான அப்பெண் அண்மையில் வல்லம் காவல் நிலையத்தில் இணையம் வழியே புகாா் அளித்தாா். இதன்பேரில் காவல் துறையினா் வழக்குப் பதிந்து முபாரக், ஆா். தினேஷ், ஏ. தினேஷ் ஆகியோரை வியாழக்கிழமை கைது செய்தனா்.