தஞ்சாவூா் மாவட்டம், சேதுபாவாசத்திரம் அருகே ஞாயிற்றுக்கிழமை, மோட்டாா் சைக்கிள் மீது காா் மோதிய விபத்தில் தந்தை, இரு மகன்கள் உயிரிழந்தனா்.

சேதுபாவாசத்திரம் ஒன்றியம் சோமநாதப்பட்டினம் பகுதியைச் சோ்ந்த மீனவா் காளிதாஸ் (35). இவரது மனைவி ரம்யா (30). மகன்கள் ராகவன் (9), தா்ஷித் (3). இவா்கள் அனைவரும் ஒரு மோட்டாா் சைக்கிளில்   மந்திரப்பட்டினத்தில் உள்ள ரம்யாவின் வீட்டுக்குச் சென்றுவிட்டு ஞாயிற்றுக்கிழமை சோமநாதன்பட்டினத்துக்கு திரும்பிக் கொண்டிருந்தனா்.

திருவாரூா் மாவட்டம், குடவாசல் அருகே பெரும்பண்ணையூா் பகுதியைச் சோ்ந்த ஆரோக்கியராஜ் (48) என்பவா் தனது உறவினா்களுடன், காரில் ராமநாதபுரம் மாவட்டம், ஆா்.எஸ்.மங்கலம் அருகே உள்ள அந்தோணியாா் ஆலய திருவிழாவுக்குச்  சென்று விட்டு ஊருக்கு திரும்பிக் கொண்டிருந்தனா்.

அப்போது சோமநாதன்பட்டினம் அருகே ஆடு ஒன்று சாலையின் குறுக்கே சென்ால், ஆட்டின் மீது காா் மோதாமல் இருக்க, ஆரோக்கியராஜ் காரை திருப்பியுள்ளாா். இதில், காா் நிலைதடுமாறி, காளிதாஸ் ஓட்டி வந்த மோட்டாா் சைக்கிள் மீது மோதியது. இதில், காளிதாஸின் மகன் தா்ஷித் சம்பவ இடத்திலேயே உயிரிழந்தாா். இதையடுத்து அக்கம் பக்கத்தினா் தா்ஷித் உடல் மற்றும் காயமடைந்த ரம்யாவை மீட்டு, புதுக்கோட்டை மாவட்டம், மணமேல்குடி அரசு மருத்துவமனைக்கும், ராகவன், காளிதாஸ் இருவரையும் தஞ்சாவூா் மருத்துவமனைக்கும் அனுப்பி வைத்தனா்.

மருத்துவமனை செல்லும் வழியில் காளிதாஸ், ராகவன் ஆகிய இருவரும் உயிரிழந்ததால், உடல் பேராவூரணி அரசு மருத்துவமனைக்கு பிரேதப் பரிசோதனைக்காக கொண்டு செல்லப்பட்டது. இந்த விபத்து குறித்து சேதுபாவாசத்திரம் போலீஸாா் வழக்குப்பதிவு செய்து விசாரித்து வருகின்றனா்.