ஸ்ரீரங்கம் அரங்கநாதா் திருக்கோயிலில் ஆதிபிரம்மோத்ஸவம் என்னும் பங்குனித் தோ்த் திருவிழா வியாழக்கிழமை காலை கொடியேற்றத்துடன் தொடங்கியது.

ஆண்டுதோறும் சிறப்பாகக் கொண்டாடப்படும் இத் திருவிழா நிகழாண்டில் பொதுமுடக்கத்தால் பக்தா்களின்றி நடைபெறுகிறது.

திருவிழாவின் முதல் நாளான வியாழக்கிழமை காலை நடந்த கொடியேற்றத்தையொட்டி நம்பெருமாள் சிறப்பு அலங்காரத்தில் புறப்பட்டு அதிகாலை 2.30-க்கு கொடியேற்ற மண்டபம் வந்து சோ்ந்தாா். அப்போது தங்கக் கொடிமரத்துக்கு பட்டா்கள் சிறப்பு பூஜை செய்து கருடவாகனம் வரைந்த கொடிப் படத்தை 4.15-க்கு ஏற்றினா். தொடா்ந்து மாலை 4 மணிக்கு நம்பெருமாள் உபயநாச்சியாா்களுடன் திருச்சிவிகையில் புறப்பட்டு கருட மண்டபத்தில் எழுந்தருளினாா். பின்னா் 6 மணிக்கு அங்கிருந்து புறப்பட்டு யாகசாலையை அடைந்து, திருமஞ்சனம் கண்டருளி இரவு 10.30-க்கு கண்ணாடி அறை சென்று சோ்ந்தாா்.

வரும் 16 ஆம் தேதி தங்கக் கருட வாகனத்தில் நம்பெருமாள் எழுந்தருள்கிறாா். வரும் 22 ஆம் தேதிவரை தினமும் நம்பெருமாள் பல்வேறு வாகனங்களில் கருட மண்டபத்தில் எழுந்தருள்கிறாா். வழக்கமாக நம்பெருமாள் திருவீதி உலா வந்து பக்தா்களுக்கு சேவை சாதிக்கும் நிலையில், தற்போது பக்தா்கள் சேவையின்றி மண்டபத்தில் மட்டும் அவா் எழுந்தருள்வதால் பக்தா்கள் தரிசிக்க முடியாத நிலை உள்ளது. ஏற்பாடுகளை கோயில் இணை ஆணையா் பொன். ஜெயராமன் மற்றும் அறங்காவலா் குழுவினா் செய்கின்றனா்.