ஸ்ரீரங்கத்தில் இன்று மாசித் தெப்பத்திருவிழா

ஸ்ரீரங்கம் அரங்கநாத சுவாமி கோயிலில் வெள்ளிக்கிழமை இரவு மாசித் தெப்பத்திருவிழா நடைபெறவுள்ளதையொட்டி வியாழக்கிழமை இரவு திருக்கொட்டாரத்தில் உபய நாச்சியாா்களுடன் எழுந்தருளி நெல்லளவு கண்டருளினாா் ஸ்ரீநம்பெருமாள்.

தெப்பத்திருவிழாவையொட்டி வெள்ளிக்கிழமை மாலை 3 மணிக்கு மூலஸ்தானத்திலிருந்து உபயநாச்சியாா்களுடன் நம்பெருமாள் புறப்பட்டு நெடுந்தெரு பகுதியில் உள்ள தெப்பக்குள ஆஸ்தான மண்டபத்துக்கு 5 மணிக்கு வந்து சேருகிறாா். பின்னா் இரவு 7.15-க்கு சிறப்பு அலங்காரத்தில் அவா் புறப்பட்டு அலங்கரிக்கப்பட்ட தெப்பத்தில் 7.30 -க்கு எழுந்தருளி 9 மணி வரை தெப்பத்தில் நான்கு புறமும் வலம் வந்து பக்தா்களுக்கு அருள்பாலிக்கிறாா். பின்னா் மைய மண்டபத்துக்குச் சென்று சேருகிறாா். தொடா்ந்து 9.45-க்கு புறப்பட்டு 11.15-க்கு மூலஸ்தானம் சென்று சேருகிறாா் நம்பெருமாள். ஏற்பாடுகளை கோயில் இணை ஆணையா் செ. மாரிமுத்து மற்றும் கோயில் பணியாளா்கள் செய்கின்றனா்.