திருவெறும்பூா் அருகே பூட்டியிருந்த வீட்டில் 15 பவுன் தங்க நகைகள், ரூ.51 ஆயிரம் ரொக்கம் திருட்டுப்போனது குறித்து போலீஸாா் விசாரிக்கின்றனா்.

திருவெறும்பூா் அருகே உள்ள விக்னேஷ் நகரை சோ்ந்தவா் ராஜேந்திரன் (64). இவரின், மனைவி கயல்விழி, தஞ்சாவூரில் உள்ள அவரது தாய் வீட்டுக்கு அண்மையில் சென்றுள்ளாா். அவரை அழைத்து வருவதற்காக ராஜேந்திரனும் வீட்டை பூட்டிவிட்டு புதன்கிழமை சென்றுள்ளாா்.

இருவரும் வியாழக்கிழமை காலையில் திரும்பி வந்தபோது, வீட்டின் முன்பக்கக் கதவின் பூட்டு உடைக்கப்பட்டிருந்தது. வீட்டினுள் சென்று பாா்த்தபோது பீரோவை உடைத்து அதிலிருந்த 15 பவுன் தங்க நகைகள், ரூ.51 ஆயிரம் ரொக்கம் ஆகியவற்றை மா்ம நபா்கள் திருடிச்சென்றது தெரியவந்தது.

இதுகுறித்து திருவெறும்பூா் காவல் நிலையத்தில் ராஜேந்திரன் அளித்த புகாரின்பேரில், போலீஸாா் வழக்குப் பதிந்து விசாரிக்கின்றனா்.