கடலூா் மாவட்டத்தில் கரோனா பாதிப்பு 20 ஆயிரத்தைக் கடந்தது.

மாவட்டத்தில் செவ்வாய்க்கிழமை வரை 19,959 போ் கரோனாவால் பாதிக்கப்பட்டிருந்த நிலையில், புதன்கிழமை வெளியான பரிசோதனை முடிவுகளின்படி மேலும் 137 பேருக்கு தொற்று உறுதிப்படுத்தப்பட்டது. இதையடுத்து, கரோனாவால் பாதிக்கப்பட்டோரின் எண்ணிக்கை 20,096-ஆக அதிகரித்தது.

இதனிடையே, புதன்கிழமை 128 போ் குணமடைந்து வீடு திரும்பினா். இதையடுத்து, குணமடைந்தோா் எண்ணிக்கை 18,387-ஆக உயா்ந்தது.

பலியானோா் விவரம்: கடலூா் அரசு மருத்துவமனையில் சிகிச்சை பெற்று வந்த குறிஞ்சிப்பாடியைச் சோ்ந்த 56 வயதானவா், பண்ருட்டியைச் சோ்ந்த 65 வயதானவா், சிதம்பரத்தில் சிகிச்சை பெற்று வந்த பண்ருட்டியைச் சோ்ந்த 42 வயதானவா், மேல்மருவத்தூரில் சிகிச்சை பெற்று வந்த 67 வயதானவா் ஆகிய 4 போ் உயிரிழந்தனா். இதையடுத்து, கரோனாவால் பலியானோா் எண்ணிக்கை 224-ஆக அதிகரித்தது.

தற்போது கடலூா் மாவட்டத்திலுள்ள மருத்துவமனைகளில் 275 பேரும், பிற மாவட்டங்களில் கடலூரைச் சோ்ந்த 210 பேரும் சிகிச்சை பெற்று வருகின்றனா்.