போக்குவரத்து துறையில் கலந்தாய்வு மூலம் இடமாறுதல்: கு. பாலசுப்பிரமணியன் வலியுறுத்தல்

சிதம்பரம்: தமிழ்நாடு போக்குவரத்து துறையில் பணியாற்றும் அலுவலா்களுக்கு இடமாறுதல், கலந்தாய்வு மூலம் செயல்படுத்த வேண்டும் என கு.பாலசுப்பிரமணியன் தெரிவித்துள்ளாா்.

சிதம்பரத்தில் தமிழ்நாடு போக்குவரத்து துறை பணியாளா் சங்கத்தின் சிறப்பு தலைவா் கு.பாலசுப்பிரமணியன் செய்தியாளா்களுக்கு அளித்த பேட்டி: போக்குவரத்து துறை பணியாளா் சங்க மாநில நிா்வாகிகள் தோ்தலில் இரண்டு அணியாக போட்டியிட்டனா். ஒரு அணியில் 14 போ் வெற்றி பெற்றனா். மற்றொரு அணியில் 3 போ் வெற்றி பெற்றனா். நான் ஆதரவு தெரிவித்த அணியில் பொதுச்செயலாளா் உள்ளிட்ட 14 போ் வெற்றி பெற்றனா். மற்றொரு அணியில் தலைவர் ரகு மற்றும் துணைத்தலைவா், பொருளாளா் வெற்றி பெற்றனா். 

இணைந்து செயல்பட வேண்டும் என வலியுறுத்தியும் ஓராண்டாக செயற்குழுக்கூட்டத்தை கூட்டவில்லை. தலைவா் சரியாக செயல்படாததால் பொருளாளா், பொதுச்செயலாளா், துணைத்தலைவா், துணைப் பொதுச்செயலாளா் 4 நிா்வாகிகள் ராஜிநாமா செய்தாா்கள். இந்த ராஜிநாமா மீதும் தலைவா் நடவடிக்கை எடுக்கவில்லை. பணிமாறுதல் உள்ளிட்ட பல்வேறு பிரச்சனைகள் குறித்து பொதுக்குழு கூட்டப்படவில்லை. 
அதனால் மாநில செயற்குழு கூட்டம் ஜன.9-ம் தேதி இணையவழியில் கூட்டப்பட்டது. கூட்டத்தில் வருகிற 30-ம் தேதிக்குள் புதிதாக தோ்தலை நடத்தி புதிய நிா்வாகிகளை தோ்ந்தெடுக்க முடிவு செய்யப்பட்டது. மேலும் புதிதாக உறுப்பினா்களை சோ்க்கவும், காலியாக உள்ள இடங்களுக்கு நிர்வாகிகளுக்கான தோ்தலை நடத்தவும் உரிய உத்தரவு வழங்க போக்குவரத்து ஆணையரை இச்செயற்குழு கேட்டுக்கொள்கிறது என தீா்மானிக்கப்பட்டது. 

மேலும் தோ்தல் நடத்தும் வரை பணியாளா்களால் தோ்ந்தெடுக்கப்பட்ட நிா்வாகிகள் கூடுதல் பொறுப்பு வழங்கப்படுகிறது. மாநில பிரசார செயலா் சுப.விஜயகுருசாமி, கூடுதல் பொறுப்பாக மாநிலத் தலைவராகவும், மாநில துணைத் தலைவா் கோ.ரா.பாலாஜி கூடுதல் பொறுப்பாக மாநில பொதுச்செயலாளராகவும், மாநில அமைப்புச் செயலாளா் ர.சுவாமிநாதன், கூடுதல் பொறுப்பாக மாநில பொருளாளராகவும், தலைமை நிலைய செயலாளா் பா.அனந்தராமன் கூடுதல் பொறுப்பாக மாநில துணைப் பொதுச்செயலாளராகவும், மாநில துணைப் பொதுச்செயலாளா் செ.அபுபக்கா் சித்திக், கூடுதல் பொறுப்பாக மாநில துணைத்தலைவராகவும் நியமிக்கப்பட்டுள்ளாா்.