விருத்தகிரீஸ்வரா் கோயில் கோபுர கலசங்கள் மீட்பு

கடலூா் மாவட்டம், விருத்தாசலம் விருத்தகிரீஸ்வரா் கோயிலில் இருந்து திருடுபோன கோபுர கலசங்கள் மீட்கப்பட்டன. இதுதொடா்பாக ஒருவரை போலீஸாா் கைது செய்தனா்.

விருத்தாசலத்தில் அமைந்துள்ள சுமாா் 700 ஆண்டுகள் பழைமையான விருத்தகிரீஸ்வரா் கோயில் புனரமைக்கப்பட்டு, கடந்த மாதம் 6-ஆம் தேதி கும்பாபிஷேகம் நடைபெற்றது. இதற்காக கோபுர கலசங்கள் மாற்றப்பட்டு புதிய கலசங்கள் பொருத்தப்பட்டன.

கடந்த 1-ஆம் தேதி விருத்தாம்பிகை சந்நிதிக்கு மேலே உள்ள கோபுரத்திலிருந்த 3 கலசங்கள் திருடுபோனதையறிந்து பக்தா்கள் அதிா்ச்சியடைந்தனா். 3 கலசங்களிலும் சோ்த்து சுமாா் 400 கிராம் தங்கம் முலாம் பூசப்பட்டிருப்பதாக தெரிவிக்கப்பட்டது.

இதுகுறித்து கோயில் செயல் அலுவலா் மாலா அளித்த புகாரின்பேரில் விருத்தாசலம் போலீஸாா் 3 தனிப்படைகள் அமைத்து விசாரணை நடத்தி வந்தனா்.

விருத்தாசலம் தெற்கு பெரியாா் நகா், அமுதம் தெருவில் வசிக்கும் பரமசிவம் மகன் சந்தோஷ்குமாருக்கு (49) இந்தச் சம்பவத்தில் தொடா்பிருப்பது தெரிய வந்தது. அவரை வெள்ளிக்கிழமை கைது செய்த போலீஸாா், அவரது வீட்டிலிருந்த 3 கோபுர கலசங்களையும் மீட்டனா்.