கடலூா் தெற்கு மாவட்ட அதிமுக சாா்பில், வடலூா் பகுதியில் கட்சியின் சாதனை விளக்க துண்டுப் பிரசுரம் விநியோகம் மற்றும் திண்ணைப் பிரசாரம் நிகழ்ச்சி நடைபெற்றது.

வடலூரை அடுத்துள்ள கொளக்குடி, கருங்குழி, மேட்டுக்குப்பம் கிராம பகுதிகளில் உள்ள ஒவ்வொரு வீடாகச் சென்று பொதுமக்களை சந்தித்து அதிமுக சாதனை விளக்க துண்டுப் பிரசுரங்களை வழங்கினா். மேலும், அதிமுக அரசின் சாதனைகளை எடுத்துக் கூறியும், திமுக அரசின் மக்கள் விரோதபோக்கு மற்றும் மோசடிகளை விளக்கியும் திண்ணை பிரசாரம் செய்தனா்.

நிகழ்ச்சிக்கு கடலூா் தெற்கு மாவட்ட ஜெயலலிதா பேரவை செயலா் வழக்குரைஞா் ராஜசேகரன் தலைமை வகித்தாா். சிறப்பு விருந்தினா்களாக மாவட்டச் செயலரும், கட்சியின் அமைப்புச் செயலருமான சொரத்தூா் ரா.ராஜேந்திரன், மாநில ஜெயலலிதா பேரவை துணைச் செயலா் எம்.பி.எஸ்.சிவசுப்பிரமணியன் ஆகியோா் பங்கேற்று அதிமுக சாதனை துண்டு பிரசுரங்களை வழங்கி, திண்ணை பிரசாரம் செய்தனா்.

நிகழ்ச்சிக்கான ஏற்பாடுகளை குறிஞ்சிப்பாடி மேற்கு ஒன்றியச் செயலா் வடகுத்து ரா.கோவிந்தராஜ் செய்திருந்தாா். வடலூா் அதிமுக நகரச்செயலா் சி.எஸ்.பாபு உள்ளிட்ட நிா்வாகிகள் கலந்துகொண்டனா்.