கடலூா் மாவட்டத்தில் உள்ள 7,85,994 குடும்ப அட்டைதாரா்களுக்கு ரூ.238.77 கோடி மதிப்பிலான பொங்கல் பரிசுத் தொகுப்பு வழங்கும் பணியை மாநில வேளாண்மை மற்றும் உழவா் நலத் துறை அமைச்சா் எம்.ஆா்.கே.பன்னீா்செல்வம் வியாழக்கிழமை தொடங்கிவைத்தாா்.

குறிஞ்சிப்பாடி, புவனகிரி, சிதம்பரம், வல்லம்படுகை, குமராட்சி ஆகிய நியாயவிலைக் கடைகளில் நடைபெற்ற நிகழ்ச்சிகளுக்கு ஆட்சியா் சிபி ஆதித்யா செந்தில்குமாா், காட்டுமன்னாா்கோவில் எம்எல்ஏ ம.சிந்தனைச்செல்வன் ஆகியோா் முன்னிலை வகித்தனா்.

குறிஞ்சிப்பாடி பேரூராட்சி, மீனாட்சிப்பேட்டை நியாயவிலைக் கடையில் குடும்ப அட்டைதாரா்களுக்கு பொங்கல் பரிசுத் தொகுப்பை வழங்கி அமைச்சா் எம்.ஆா்.கே.பன்னீா்செல்வம் பேசியதாவது:

கடலூா் மாவட்டத்தில் 7,85,547 அரிசி குடும்ப அட்டைதாரா்கள், 447 இலங்கை தமிழா் அட்டைதாரா்கள் என மொத்தம் 7,85,994 குடும்ப அட்டைதாரா்களுக்கு ரூ.238.77 கோடி மதிப்பில் பொங்கல் பரிசுத் தொகுப்பு வழங்கப்படுகிறது.

பரிசுத்தொகுப்பை பெறுவதற்கு வீடு வீடாகச் சென்று டோக்கன்கள் வழங்கப்பட்டுள்ளது. பொதுமக்கள் தங்களுக்கு வழங்கப்பட்ட டோக்கனில் குறிப்பிட்ட தேதியன்று பரிசுத் தொகுப்பை பெற்று பொங்கல் பண்டிகையை குடும்பத்தினருடன் சிறப்பாக கொண்டாட வேண்டும். வள்ளலாரின் புகழை சா்வதேச அளவில் கொண்டு செல்ல சா்வதேச மையம் அமைக்கும் பணி நடைபெற்று வருகிறது என்றாா்.

நிகழ்வில் சிதம்பரம் சாா் - ஆட்சியா் கிஷன்குமாா், கூட்டுறவு சங்கங்களின் இணைப் பதிவாளா் சொ.இளஞ்செல்வி, கோட்டாட்சியா் சுந்தரராஜன், மாவட்ட கல்விக் குழுத் தலைவா் வி.சிவக்குமாா், வடலூா் நகா்மன்றத் தலைவா் சு.சிவக்குமாா், பேரூராட்சித் தலைவா் கோகிலாகுமாா், துணைத் தலைவா் ராமா் உள்ளிட்டோா் கலந்துகொண்டனா்.

பண்ருட்டியில்...: பண்ருட்டி நகரத்தில் நகராட்சி பின்புறம், லட்சுமிபதி நகா், அய்யனாா் கோயில் தெருவில் உள்ள நியாயவிலைக் கடைகளில் குடும்பஅட்டைதாரா்களுக்கு நகா்மன்றத் தலைவா் க.ராஜேந்திரன் பொங்கல் பரிசுத் தொகுப்பை வழங்கினாா். திமுக மாவட்ட தொண்டரணி அமைப்பாளா் கதிா்காமன், நகர அவைத் தலைவா் ராஜா, நகரப் பொருளாளா் ராமலிங்கம், துணைச் செயலா் கௌரி அன்பழகன் உள்ளிட்டோா் கலந்துகொண்டனா்.

வேப்பூரை அடுத்த கழுதூா் கிராமம், விருத்தாசலத்தை அடுத்துள்ள முகாசபரூா், எம்.பட்டி ஊராட்சி, நெய்வேலி சட்டப் பேரவைத் தொகுதிக்குள்பட்ட காட்டுக்கூடலூா் நியாயவிலைக் கடைகளில் மாநில தொழிலாளா் நலன் மற்றும் திறன் மேம்பாட்டுத் துறை அமைச்சா் சி.வெ.கணேசன் குடும்ப அட்டைதாரா்களுக்கு தமிழக அரசின் பொங்கல் பரிசுத் தொகுப்பை வழங்கி தொடங்கிவைத்தாா்.

நிகழ்வில், நெய்வேலி எம்எல்ஏ சபா.ராசேந்திரன், விருத்தாசலம் எம்எல்ஏ எம்.ஆா்.ஆா்.ராதாகிருஷ்ணன், மாவட்ட வருவாய் அலுவலா் புண்ணியகோட்டி, விருத்தாலம் கூட்டுறவு துணைப் பதிவாளா் சவிதா, திட்டக்குடி வட்டாட்சியா் உதயகுமாா் உள்ளிட்டோா் கலந்துகொண்டனா்.