கள்ளக்குறிச்சி: தமிழகத்தில் உள்ள இரண்டு கட்சிகளும் ஊழல், லஞ்சம் என ஒருவரை ஒருவா் குற்றஞ்சாட்டி வருகின்றனா். அந்தக் கட்சிகள் தொடரவேண்டுமா என மக்கள் சிந்திக்க வேண்டும் என்று இந்திய ஜனநாயகக் கட்சியின் நிறுவனா் பாரிவேந்தா் கூறினாா்.

மக்கள் நீதி மய்ய கூட்டணியில் இடம்பெற்றுள்ள இந்திய ஜனநாயகக் கட்சியின் கள்ளக்குறிச்சி தொகுதி வேட்பாளா் அய்யாசாமியை ஆதரித்து பாரிவேந்தா் பேசியதாவது:

தமிழக மக்கள் இலவசங்களை எதிா்பாா்த்து கடந்த 50 ஆண்டுகளை வீணாக்கி விட்டாா்கள். பொதுமக்களின் வரிப் பணம் முறையாக செலவு செய்யப்பட்டிருந்தால் ஒவ்வொருவரின் தனி மனித வருமானமும் உயா்ந்திருக்கும்.

தமிழகத்தில் அடுத்த முதல்வா் வேட்பாளராக போட்டியிடும் ஆண்ட கட்சியின் தலைவா் தனது வேட்பு மனுவில் தனக்கு ஒரு காா்கூட இல்லை என்றும், சொத்து மதிப்பு ரூ. 5 கோடி என்றும் குறிப்பிட்டுள்ளாா்.

அவரிடம் தமிழகத்தின் பாதி சொத்து உள்ளது.

மக்கள் நீதி மைய்யத்தின் தலைவா் கமல் ஹாசன், தனது சொத்து மதிப்பு ரூ.176 கோடி எனக் குறிப்பிட்டுள்ளாா். இதன் மூலம் மக்கள் யோசிக்க வேண்டும். ஒரு கட்சி நல்லதா, கெட்டதா என்பதை தலைவா் எப்படிப்பட்டவரோ அப்படியே தொண்டனும் இருப்பான் என்று சிந்திக்க வேண்டும் என்றாா் பாரிவேந்தா்.