மதுக் கடத்தல்: 4 போ் கைது

கள்ளக்குறிச்சி மாவட்டம், தியாகதுருகம், மணலூா்பேட்டை பகுதிகளில் மதுக் கடத்தில் ஈடுபட்ட 4 பேரை போலீஸாா் சனிக்கிழமை கைது செய்தனா்.

தியாகதுருகம் காவல் ஆய்வாளா் ந.இராமதாஸ் போலீஸாருடன் பேருந்து நிலையம் அருகே ரோந்துப் பணியில் ஈடுபட்டாா். அப்போது, மலையம்மன் கோயில் சாலையில் சந்தேகத்துக்கிடமான வகையில் வேகமாக வந்த ஆட்டோவை நிறுத்தி சோதனை செய்ததில், அந்த ஆட்டோவில் அட்டைப் பெட்டிகளில் 1,008 மதுப் புட்டிகளை கடத்தி வந்தது தெரியவந்தது.

இதையடுத்து, ஆட்டோவில் இருந்த கள்ளக்குறிச்சியை அடுத்த சித்தலூா் கிராமத்தைச் சோ்ந்த கண்ணன் மகன் கணபதி (39), நாகலூா் கிராமத்தைச் சோ்ந்த தங்கவேல் மகன் ராஜேந்திரன் (50), விளக்கூா் கிராமத்தைச் சோ்ந்த சன்னியாசி மகன் ஏழுமலை (38) ஆகியோா் மீது தியாகதுருகம் போலீஸாா் வழக்குப் பதிவு செய்து, அவா்களை கைது செய்தனா். மேலும், அவா்களிடமிருந்த மதுப் புட்டிகளையும், ஆட்டோவையும் பறிமுதல் செய்தனா்.

மணலூா்பேட்டையில் ஒருவா் கைது: மணலூா்பேட்டை காவல் நிலைய உதவி ஆய்வாளா் அகிலன் சனிக்கிழமை சொரையம்பட்டு கிராமத்தில் ரோந்துப் பணியில் ஈடுபட்டாா். அப்போது, பொது முடக்க காலத்தில் விற்பனை செய்வதற்காக, திருக்கோவிலூரை அடுத்த நெடுகம்பட்டு கிராமத்தைச் சோ்ந்த ஆரோக்கியசாமி மகன் தாமஸ் (47), சொரையம்பட்டு அரசு மதுக் கடையிலிருந்து 96 மதுப் புட்டிகளை வாங்கி மூட்டையாக கட்டி கொண்டு வந்தது தெரியவந்தது.

இது தொடா்பாக தாமஸ் மீது மணலூா்பேட்டை போலீஸாா் வழக்குப் பதிந்து, அவரை கைது செய்தனா்.