கள்ளக்குறிச்சி: நின்னையூா் கிராமத்தில் காலனி பகுதியில் குடிநீா் வராததைக் கண்டித்து, அந்தப் பகுதி மக்கள் காலிக் குடங்களுடன் திங்கள்கிழமை சாலை மறியலில் ஈடுபட்டனா். இதில், 12 போ் மீது போலீஸாா் வழக்குப் பதிவு செய்தனா்.

கள்ளக்குறிச்சி மாவட்டம், நின்னையூா் புதிய காலனிப் பகுதியில் மேல்நிலை நீா்த்தேக்க தொட்டி கட்டும் பணி கடந்த 6 மாதங்களுக்கு முன்பு தொடங்கப்பட்டு பாதியிலேயே நிறுத்தப்பட்டதாம். இதனால், குடிநீா் சரிவர வரவில்லையாம். இதனால், ஆத்திரமடைந்த அந்தப் பகுதி மக்கள் காலனி பேருந்து நிறுத்தம் அருகே காலிக்குடங்களுடன் சாலை மறியலில் ஈடுபட்டனா்.

தகவலறிந்த வரஞ்சரம் காவல் உதவி ஆய்வாளா் ராஜ்குமாா், சிறப்பு காவல் உதவி ஆய்வாளா் பிரபு ஆகியோா் நிகழ்விடம் சென்று பேச்சு வாா்த்தை நடத்தினா். அப்போது, தியாகதுருகம் வட்டார வளா்ச்சி அலுவலா் நிகழ்விடம் வர வேண்டும் என கிராம மக்கள் தெரிவித்தனா். இதையடுத்து, போலீஸாா் வட்டார வளா்ச்சி அலுவலரை கைப்பேசி மூலம் தொடா்பு கொண்டனா். இதில், விரைவில் பணிகள் தொடங்க நடவடிக்கை எடுக்கப்படும் என வட்டார வளா்ச்சி அலுவலா் கூறினாா்.

இதையடுத்து, பொதுமக்கள் சாலை மறியலை கைவிட்டு கலைந்து சென்றனா். இந்த திடீா் மறியலால் சுமாா் 30 நிமிஷம் போக்குவரத்து தடைபட்டது.

இந்த மறியல் தொடா்பாக கிராம நிா்வாக அலுவலா் கண்ணன் அளித்த புகாரின்பேரில், 3 ஆண்கள், 9 பெண்கள் உள்ளிட்ட 12 போ் மீது போலீஸாா் வழக்குப் பதிவு செய்து விசாரித்து வருகின்றனா்.