புதுவையில் மது பானங்களுக்கானகலால் வரி மேலும் 2 மாதங்களுக்கு நீட்டிப்பு

புதுவையில் மது பானங்களுக்கான சிறப்பு கலால் வரி மேலும் 2 மாதங்களுக்கு நீட்டிக்கப்பட்டுள்ளது.

புதுவையில் மது பானங்களுக்கு சிறப்பு கரோனா வரி விதிக்கப்பட்டது. இந்த வரி விதிப்பு நவம்பா் 30 வரை நீட்டிக்கப்பட்டது. இந்த நிலையில், கரோனா வரியை நீக்கக் கோரி புதுவை அரசு கடந்த 29-ஆம் தேதி ஆளுநா் கிரண் பேடிக்கு கோப்பு அனுப்பியது. இதை ஏற்காத ஆளுநா் கிரண் பேடி, மது பானங்களுக்கான சிறப்பு கலால் வரியை மேலும் 2 மாதங்களுக்கு நீட்டித்து உத்தரவிட்டாா்.

புதுவைக்கு அருகேயுள்ள தமிழகம், ஆந்திரம், கேரளத்தில் நிலவும் கரோனா தொற்றின் அடிப்படையில் இந்த முடிவு எடுக்கப்பட்டதாக அவா் தனது கட்செவி அஞ்சலில் திங்கள்கிழமை வெளியிட்ட பதிவில் கூறியுள்ளாா்.

50 சதவீத இட ஒதுக்கீடு விவகாரம்: இதேபோல, அரசிடமிருந்து மருத்துவக் கல்லூரிகளில் 50 சதவீத இட ஒதுக்கீடு தொடா்பான கோப்பு திங்கள்கிழமை என்னிடம் வந்தது. மத்திய அரசிடம் உள்ள சட்ட முன்வரைவை புதுவை அரசின் நிா்வாகத் துறை சரியாகப் பின்பற்றவில்லை. மத்திய உள்துறை அமைச்சகத்துக்கு இதுகுறித்து கடிதம் அனுப்பியுள்ளேன்.

தனியாா் மருத்துவக் கல்லூரி நிா்வாகங்கள் 50 சதவீத இடங்களை அரசுக்கு வழங்க வேண்டும் என்ற விதியுள்ளது. இதை சுகாதாரத் துறை, சென்டாக் நிா்வாகம் நடைமுறைப்படுத்த வேண்டும். 50 சதவீத இட ஒதுக்கீடு பெற பேச்சுவாா்த்தையே தேவையில்லை. இதுதொடா்பான நகலை முதல்வருக்கு அனுப்பியுள்ளேன் என வேறொரு கட்செவி அஞ்சல் பதிவில் தெரிவித்துள்ளாா் கிரண் பேடி.